ەنەرگەتيكا ءمينيسترى الماسادام ساتقالييەۆ ءماجىلىستىڭ جالپى وتىرىسىنان كەيىن ب ا ق وكىلدەرىنىڭ ساۋالىنا بەرگەن جاۋابىندا سۇيىتىلعان گاز باعاسى بەنزين باعاسىمەن تەڭەسۋى مۇمكىن ەكەنىن ءمالىم ەتتى، دەپ حابارلايدى اlmaty-akshamy.kz.
«بىزدە سۇيىتىلعان مۇناي گازىن تۇتىنۋ كولەمى كۇرت ءوسىپ كەتتى. ول نەگىزى اۆتوموبيلدەردى گازعا اۋىستىرۋمەن بايلانىستى. اسىرەسە كولىكتەردى اۋەسقوي تاسىلمەن گاز جاعاتىن ەتىپ قايتا جابدىقتاۋ جاپپاي بەلەڭ الدى. 9 ايدىڭ ىشىندە سۇيىتىلعان گازدىڭ وندىرىسىنەن تۋىندايتىن تەڭگەرىم 25 پايىزعا ارتتى. بىزگە قوسىمشا كولەمدەر ىزدەۋگە تۋرا كەلىپ وتىر. ءبىز «تەڭىزشيەۆرويلمەن» كەلىسسوز جۇرگىزدىك. ولار ىشكى نارىققا اي سايىن قوسىمشا 10 مىڭ توننا جەتكىزىپ تۇر. ءبىز «قازمۇنايگازدىڭ بۇكىل كولەمىن ىشكى نارىققا باعىتتادىق. وسىنىڭ ەسەبىنەن تەڭگەرىمدى ۇستاپ تۇرمىز. ياعني، ءقازىر سۇيىتىلعان گاز تاپشىلىعى جوق. وڭىرلەردە جەتكىزۋدەن تۋىنداعان ماسەلەلەر بار شىعار. ءبىز وسىنى پروبلەما دەپ وتىرمىز»، - دەدى ول.
مينيستر قازاقستاندىقتارعا كولىگىن گازعا اۋىستىرۋعا اسىقپاۋ كەرەك دەگەن كەڭەسىن تاعى قايتالادى.
«ماشينالاردى وسىنداي قارقىنمەن گازعا اۋىستىرا بەرەتىن بولسا، كەلەشەكتە گاز وڭدەۋ قۋاتتارىنىڭ الەۋەتى قىسقا مەرزىمدەگى قاجەتتىلىكتەرگە جەتپەي قالۋى مۇمكىن. ءتىپتى سۇيىتىلعان مۇناي گازىن يمپورتتاۋعا ءماجبۇر بولۋىمىز مۇمكىن. ول كەزدە باعا مۇلدە باسقاشا بولادى. ءتىپتى بەنزين باعاسىمەن سالىستىراتىنداي دەڭگەيگە شىعۋى ىقتيمال. سوندىقتان اۆتوموبيل تىزگىندەۋشىلەردى كولىكتەرىن گازعا اۋىستىرۋعا اسىقپاۋعا ۇندەپ ءجۇرمىز»، - دەدى الماسادام ساتقالييەۆ.