ق ر پارلامەنتى سەناتىنىڭ دەپۋتاتى سۇيىندىك الداشيەۆتىڭ ايتۋىنشا، وتكەن جىلدىڭ قورىتىندىسى بويىنشا ەلىمىزدە ايتارلىقتاي ەنەرگيا تاپشىلىعى سەزىلۋدە. بۇل تاپشىلىق شامامەن 3 ملرد كيلوۆاتت ساعاتىنا جەتكەن، دەپ حابارلايدى aqshamnews.kz
ەلەكتر ەنەرگياسىنىڭ تاپشىلىعىن شەشۋ ماسەلەسى كۇردەلى بولىپ وتىرعاندىقتان، مەملەكەت باسشىسى بۇل شەشىمدى حالىقتىڭ ءوزى قابىلداۋىن ماڭىزدى دەپ ساناپ، اتوم ەلەكتر ستانسياسىن سالۋ ماسەلەسىن رەفەرەندۋمعا شىعارۋدى ۇسىندى.
– بۇل ماسەلە ءاربىر قازاقستاندىقتى تولعاندىرىپ وتىر. سوندىقتان مەملەكەت باسشىسى حالىقتىڭ پىكىرىن ەسكەرىپ، تۇپكىلىكتى شەشىمدى حالىقتىڭ ءوزى قابىلداۋى كەرەك دەپ ەسەپتەيدى. ءبىز بۇل ماسەلەنى بۇگىن مۇنايشىلارمەن بىرگە تالقىلاپ وتىرمىز، – دەدى الداشيەۆ.
سونداي-اق، ماڭعىستاۋ وبلىسىندا اتوم ەلەكتر ستانسياسىنىڭ قۇرىلىسىن قولداۋ ماقساتىندا ارنايى حالىقتىق شتاب قۇرىلىپ، بەلسەندى جۇمىس جۇرگىزىپ جاتقانىن ايتا كەتۋ كەرەك. ونىڭ قۇرامىندا ساياسي پارتيالار، قوعامدىق ۇيىمدار وكىلدەرى، سونداي-اق ەنەرگەتيكا سالاسىنىڭ تاجىريبەلى ماماندارى بار. شتاب مۇشەلەرى ءقازىر ءارتۇرلى ەڭبەك ۇجىمدارىمەن كەزدەسىپ، قوعامدى الاڭداتقان ساۋالدارعا ناقتى ءارى تۇسىنىكتى جاۋاپتار بەرۋدە. بۇل كەزدەسۋلەر ارقىلى حالىقتى تولعاندىراتىن ماسەلەلەرگە قاتىستى اشىق اقپارات بەرۋ جانە حالىقتىڭ اتوم ەنەرگەتيكاسى تۋرالى ساۋاتىن ارتتىرۋ جۇمىستارى جۇرگىزىلۋدە.