الماتىدا 1967 جىلدان باستاپ پايدالانىلىپ كەلە جاتقان قۇبىردى اۋىستىرۋ ءۇشىن ءسۇيىنباي داڭعىلىندا كولىك قوزعالىسى شەكتەلەدى، دەپ حابارلايدى almaty-akshamy.kz «الماتى جىلۋ جەلىلەرى» جشس-نە سىلتەمە جاساپ.
2024 جىلى 1 شىلدەدەن 31 تامىزعا دەيىن الماتىنىڭ تۇركسىب اۋدانىنداعى ءسۇيىنباي داڭعىلىندا №375 ۇيدەن №419 ۇيگە دەيىن كولىك قوزعالىسى شەكتەلەدى.
اتالعان كوشەدە قوزعالىس شىعىس جاققا قاراي جابىلادى. باتىس جاعىندا اۆتوكولىك ءۇشىن ەكىجاقتى قوزعالىس ۇيىمداستىرىلادى.
1967 جىلدان باستاپ پايدالانۋعا بەرىلگەن جالپى ۇزىندىعى 506 مەترلىك قۇبىردى اۋىستىرۋ كەزىندە قاۋىپسىزدىكتى قامتاماسىز ەتۋ ءۇشىن ۋاقىتشا شەكتەۋ ەنگىزىلەدى.
ەستەرىڭىزگە سالا كەتەيىك، قوزعالىستى شەكتەۋگە قاتىستى بارلىق اقپارات almaty.kz سايتىندا، @AlmatyJoly Telegram ارناسىندا، اۋداندىق اكىمدىكتەر مەن باسقارمالاردىڭ الەۋمەتتىك جەلىلەرىندە، سونداي-اق «2GIS» جانە «ياندەكس كارتالارى» سەرۆيستەرىندە جاريالانعان.
ۋاقىتشا قولايسىزدىققا تۇسىنىستىكپەن قاراۋدى جانە كورسەتىلگەن اۋماقتى اينالىپ ءوتۋ جولدارىن الدىن الا قاراستىرۋدى سۇرايمىز.