Almaty-akshamy.kz سايتىنىڭ بۇگىنگى لەنتاسىنا شولۋ – كۇن كەرۋەنى
الماتىدا ءداستۇرلى Digital فورۋم
ەۋرازيالىق ۇكىمەتارالىق كەڭەستىڭ وتىرىسى وتەدى. قالالىق پوليسيا دەپارتامەنتى وسىعان بايلانىستى 1-2 اقپان كۇندەرى جول شەكتەۋلەرى بولۋى ىقتيمال ەكەنىن ەسكەرتتى.
شەكتەۋ قويىلۋى مۇمكىن ايماقتار:
- 1 اقپاندا ءال-فارابي داڭعىلى، شااج، قۇلجا تاس جولى، ساين، شالياپين، مايلين، بۇقتىرما كوشەلەرىنىڭ ايماعىندا تۇزەتۋلەر بولۋى مۇمكىن.
- 2 اقپان – ءال-فارابي، سەيفۋللين داڭعىلدارى، ساين، جاروكوۆ، شالياپين كوشەلەرىندە.
پەدوفيلدەر ومىرلىك جازاعا كەسىلۋى مۇمكىن
ءماجىلىس دەپۋتاتتارى بۇل تۋرالى جاڭا زاڭ جوباسىن ازىرلەدى. دەپۋتاتتار "قازاقستاننىڭ كەيبىر زاڭنامالىق اكتىلەرىنە ايەلدەردىڭ قۇقىقتارى مەن بالالاردىڭ قاۋىپسىزدىگىن قامتاماسىز ەتۋ ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى" زاڭ جوباسىن قارايدى.
4 وبلىستا كولىك قوزعالىسى شەكتەلدى
سەبەپ – اۋا-رايىنىڭ قولايسىزدىعى.
2024 جىلعى 31 قاڭتارداعى مالىمەت بويىنشا، اۋا-رايىنىڭ قولايسىزدىعىنا بايلانىستى 4 وبلىستا رەسپۋبليكالىق ماڭىزى بار اۆتوجولداردىڭ 7 ۋچاسكەسىندە كولىك قوزعالىسىنا شەكتەۋ ەنگىزىلدى.
اسپاننىڭ بيلىگى...
ەلىمىزدىڭ كولىك ءمينيسترى مارات قارابايەۆتىڭ ايتۋىنشا، 22 اۋەجاي شەتەلدىك ينۆەستورلارعا بەرىلۋى مۇمكىن.
"ازاماتتىق اۆياسيا سالاسىن دامىتۋ جانە كونتينەنتتىك ترانزيتتىك حاب قۇرۋ ءۇشىن ينۆەستورلارعا وتاندىق 22 اۋەجايدى باسقارۋعا بەرۋ جوسپارلانعان"، - دەدى مينيستر.
سۋدىڭ سۇراۋى...
بيىل سۋ باعاسى قىمباتتايدى. بۇل تۋرالى ۇلتتىق ەكونوميكا ءمينيسترى الىبەك كۋانتىروۆ مالىمدەدى.
«سۋ ءتاريفى وتە ارزان. ليترىنە – 4 تيىن. ارينە، ءبىز سۋدى ۇقىپتى پايدالانبايمىز. ەگەر ءسىز قوعامدىق مونشاعا بارساڭىز، اعىل-تەگىل اققان سۋدى كورەسىز. وسىنىڭ ءوزى ءبىزدىڭ سۋدى دۇرىس پايدالانبايتىنىمىزدى ايعاقتايدى. ال سۋ دەگەنىڭىز – تىرشىلىك كوزى. بۇگىن سۋ قورى ءمينيسترى ەلىمىزدە سۋ تاپشىلىعى ورىن الۋى مۇمكىن ەكەنىن ەسكەرتتى. سوندىقتان سۋدى ۇنەمدەۋگە ءتيىستىمىز»، – دەدى ءا.قۋانتىروۆ.
قازاقستان تانكەر فلوتىن كەڭەيتتى
مەملەكەت باسشىسىمەن كەزدەسكەن «قازمۇنايگاز» ۇك» اق باسقارما ءتوراعاسى ماعزۇم مىرزاعالييەۆ كومپانيانىڭ 2023 جىلعى وپەراسيالىق جانە قارجىلىق قىزمەتىنىڭ قورىتىندىسى تۋرالى ەسەپ بەردى. بەرىلگەن مالىمەتتەرگە سايكەس، بىلتىر "قازمۇنايگاز" 2022 جىلمەن سالىستىرعاندا نەگىزگى وندىرىستىك كورسەتكىشتەر بويىنشا وسىمگە قول جەتكىزگەن.
الاشتىڭ ءاسانالىسى
ايتۋلى اكتەر ءاشىموۆ جەكە زاتتارىن ارحيۆكە تاپسىردى. وندا ونەر يەسىنىڭ ءوزىنىڭ قولجازبالارى، وردەندەرى جانە وزگە دە زاتتارى بار. وسىعان وراي الماتىداعى مەملەكەتتىك ارحيۆتە «كينو جانە تەاتر تارلانى – ءاسانالى» مۋزەي-بۇرىشى اشىلدى. قۇجاتتار سانى 200-دەن اسادى. كەز كەلگەن قالا تۇرعىندارى مەن قوناقتارى ارحيۆتەگى زاتتاردى الدىن-الا ءوتىنىم بەرۋ ارقىلى كورە الادى.
وزاعاڭمەن وتىز كۇن...
قازاقستان مەن وزبەكستان ازاماتتارى ەكى ەل اۋماعىندا 30 كۇن تىركەۋسىز جۇرە الادى. كەلىسىمگە وزگەرىستەر ەنگىزۋ تۋرالى حاتتاماعا 2022 جىلى 22 جەلتوقساندا تاشكەنت قالاسىندا قول قويىلعان بولاتىن.
جاڭا قۇجات ەكى ەل ازاماتتارىنىڭ قازاقستان مەن وزبەكستان اۋماعىندا بولۋى ءۇشىن قولايلى جاعداي جاسايدى، باۋىرلاس ەلدەر اراسىنداعى ەكونوميكالىق بايلانىستىڭ، ىسكەرلىك جانە مادەني تاجىريبە الماسۋدىڭ ودان ءارى دامۋىنا ىقپال ەتەدى.