ستۋدەنتتەر سۋدى تازارتۋ ءادىسىن ويلاپ تاپتى.
سۋ رەسۋرستارى جانە يرريگاسيا ءمينيسترى نۇرجان نۇرجىگىتوۆ جامبىل وبلىسىنا جۇمىس ساپارىمەن بارىپ، سۋ شارۋاشىلىعىن دامىتۋ جانە سۋارۋ ماۋسىمىنا دايىندىق بارىسىمەن تانىستى. مينيستر الدىمەن ەلىمىزدە سۋ سالاسىنىڭ ماماندارىن دايارلايتىن جەتەكشى وقۋ ورىندارىنىڭ ءبىرى - م.ح.دۋلاتي اتىنداعى تاراز وڭىرلىك ۋنيۆەرسيتەتىنە باردى، دەپ حابارلايدى Almaty-akshamy.kz سۋ جانە يرريگاسيا مينيسترلىگىنە سىلتەمە جاساپ.
ءبىلىم ورداسى بىلتىر «قازفوسفات» ج ش س قولداۋىمەن مەندەلەيەۆ اتىنداعى رەسەي حيميا-تەحنولوگيالىق ۋنيۆەرسيتەتىمەن قوسديپلومدى ءبىلىم بەرۋ باعدارلاماسىن ىسكە قوستى. بۇگىندە 7 ستۋدەنت اتالعان جوبا بويىنشا رەسەيدە ءبىلىم الىپ جاتىر.
«قوسديپلومدى ءبىلىم بەرۋ باعدارلاماسى ءساتتى جۇزەگە اسقانىنا قۋانىشتىمىن. سۋ رەسۋرستارى جانە يرريگاسيا مينيسترلىگى بىلىكتى كادر دايارلاۋ باعىتىندا ءبىرقاتار ءىس-شارالاردى جۇزەگە اسىردى. اتاپ ايتقاندا، «بولاشاق» ءبىلىم بەرۋ باعدارلاماسىنا «گيدروگەولوگيا»، «سۋ رەسۋرستارى» جانە «سۋ قاۋىپسىزدىگى» سياقتى جاڭا سۋ سالاسىنىڭ باعدارلامالارى ەنگىزىلدى. قازاقستاندىق ستۋدەنتتەر وسى جىلدان باستاپ اتالعان باعىتتار بويىنشا شەتەلدە ءبىلىم الا الادى. سونىمەن قاتار، ۆەدومستۆو جانىنان كاسىپتىك بىلىكتىلىك جونىندەگى سالالىق كەڭەس قۇرىلدى»،- دەدى سۋ رەسۋرستارى جانە يرريگاسيا ءمينيسترى نۇرجان نۇرجىگىتوۆ.
نۇرجان نۇرجىگىتوۆ وقۋ كورپۋستارىن، زەرتحانالار مەن جىلىجاي كەشەنىن ارالاپ، ۋنيۆەرسيتەت وقىتۋشىلارى مەن ستۋدەنتتەرىنىڭ عىلىمي ازىرلەمەلەرىمەن تانىستى.
ماسەلەن، ۋنيۆەرسيتەت ۇستازدارى مەن ستۋدەنتتەرى ماقتا قاۋىزىنان لاستانعان سۋدى قايتا تازالايتىن سۇزگى ازىرلەگەن. جوبا اۆتورلارى ازىرلەمەگە ءقازىردىڭ وزىندە شەتەلدىكتەر تاراپىنان قىزىعۋشىلىق جوعارى ەكەنىن ايتادى. ۋنيۆەرسيتەت قابىرعاسىندا جاسالعان تاعى ءبىر ماڭىزدى ازىرلەمە - سۋ ۇنەمدەيتىن تىڭايتقىش. ورگانيكالىق قالدىقتاردىڭ نەگىزىندە جاسالعان تىڭايتقىش توپىراقتىڭ قۇنارلىعىن ارتتىرىپ، ىلعالدى ۋزاق ۋاقىت ساقتايدى. نۇرجان نۇرجىگىتوۆ مينيسترلىك ماماندارى اتالعان ازىرلەمەلەردى مۇقيات زەرتتەپ، وندىرىستە پايدالانۋ مۇمكىندىكتەرىن زەردەلەيتىنىن مالىمدەدى.
جۇمىس ساپارى اياسىندا مينيستر ۋنيۆەرسيتەتتە وتكەن سۋ سالاسىن دامىتۋ تاقىرىبىنا ارنالعان فورۋمعا قاتىستى. نۇرجان نۇرجىگىتوۆ مينيسترلىك جۇمىسىنىڭ نەگىزگى باعىتتارى تۋرالى ايتىپ، وقىتۋشى-پروفەسسورلار مەن ستۋدەنتتەردىڭ سۇراقتارىنا جاۋاپ بەردى.