ەفيوپيا مەن ساۋد ارابياسى كورولدىگىنىڭ اۋماعى ارقىلى ەۆاكۋاسيالاۋ جۇمىستارى جالعاسىپ جاتىر
بۇگىنگى تاڭدا قازاقستاننىڭ ءبىرقاتار ازاماتى قاقتىعىس ايماعىنان ەۆاكۋاسيالاندى. ەفيوپيا مەن ساۋد ارابياسى كورولدىگىنىڭ اۋماعى ارقىلى ەۆاكۋاسيالاۋ جۇمىستارى جالعاسىپ جاتىر، دەپ حابارلايدى Almaty-akshamy.kz سىرتقى ىستەر مينيسترلىگىنىڭ رەسمي سايتىنا سىلتەمە جاساپ.
سۋدانداعى سوعىس قيمىلدارى باستالعان ساتتەن باستاپ قازاقستان رەسپۋبليكاسىنىڭ ەفيوپياداعى ەلشىلىگى قازاقستاندىق ازاماتتاردى قاقتىعىس ايماعىنان ەۆاكۋاسيالاۋ ماسەلەسىن بارىنشا پىسىقتاۋعا كىرىستى.
ەفيوپيادا تىركەلگەن ءبىرقاتار ەلشىلىكتەر مەن حالىقارالىق ۇيىمداردىڭ وكىلدەرىمەن كەزدەسۋلەر وتكىزىلىپ، ولارعا قازاقستان رەسپۋبليكاسىنىڭ ازاماتتارىن سۋداننان ەۆاكۋاسيالاۋعا كومەكتەسۋ ءۇشىن رەسمي وتىنىشتەر جىبەرىلدى.
بۇگىنگى تاڭدا قازاقستاننىڭ ءبىرقاتار ازاماتى قاقتىعىس ايماعىنان ەۆاكۋاسيالاندى. ەفيوپيا مەن ساۋد ارابياسى كورولدىگىنىڭ اۋماعى ارقىلى ەۆاكۋاسيالاۋ جۇمىستارى جالعاسىپ جاتىر.
ەفيوپياداعى ق ر ەلشىلىگى ازاماتتارىمىزدى سۋداننان كەلىسىلگەن جانە قاۋىپسىزدىكپەن شىعارۋ ءۇشىن مىسىرداعى جانە ساۋد ارابياسىنداعى ق ر ديپلوماتيالىق وكىلدىكتەرىمەن تىعىز بايلانىستا.
ق ر ازاماتتارىنىڭ ناقتى سانىن انىقتاۋ جانە ولارعا سۋداننان ەۆاكۋاسيالاۋعا جاردەم كورسەتۋ ءۇشىن ەلشىلىك جانىنان جەدەل جەلى اشىلدى: +251 945 051 624 (WhatsApp)، kazembethiopia@gmail.com، kazembethiopia@mfa.kz.
ەلشىلىك ەفيوپيا سىرتقى ىستەر مينيسترلىگىنە، بۇۇ-نىڭ سۋدان مەن ەفيوپياداعى بولىمشەلەرىنە، سونداي-اق تۇركيا، رەسەي جانە جاپونيا ەلشىلىكتەرىنە قازاقستان ازاماتتارىن ەۆاكۋاسيالاۋعا بەلسەندى كومەك كورسەتكەنى ءۇشىن العىسىن بىلدىرەدى.
15 ساۋىردە سۋداننىڭ ۇلتتىق قورعانىس كۇشتەرى مەن جەدەل ارەكەت ەتۋ كۇشتەرى اراسىندا قارۋلى قاقتىعىس باستالعان بولاتىن. ءقازىر حارتۋم قالاسىندا جانە ەلدىڭ باسقا ايماقتارىندا سوعىس قيمىلدارى ءجۇرىپ جاتىر. قاقتىعىس سالدارىنان قازا تاپقان بەيبىت تۇرعىندار سانى 459 ادامعا جەتتى، 4 075 ادام جاراقات الدى.