سۋ ۇنەمدەۋ تەحنولوگيالارىن ەنگىزۋدى جەدەلدەتۋ ماقساتىندا ەلىمىزدە كاسىپورىنداردى ونەركاسىپتە سۋدى قايتا پايدالانۋ جۇيەلەرىنە كوشۋگە ىنتالاندىرۋ بويىنشا ءىس-شارالار قابىلداندى.
جاڭا سۋ كودەكسىنىڭ رەداكسياسىندا كاسىپورىندار ءۇشىن بەس جىل ىشىندە سۋدى اينالىمدى نەمەسە قايتا پايدالانۋ جۇيەلەرىنە كوشۋ جوسپارىن ازىرلەۋ تالاپ ەتىلگەن. ءار وبلىس بويىنشا سۋدى قايتا پايدالانۋدى ۇلعايتۋ ءۇشىن 2030 جىلعا دەيىن مودەلدىك جوسپارلار بەكىتىلگەن.
2030 جىلدىڭ سوڭىنا دەيىن ەكونوميكا سالالارىنداعى سۋدى قايتا پايدالانۋ ۇلەسىن 17%-دان 28%-عا دەيىن ۇلعايتۋ كوزدەلۋدە.
سونداي-اق، تۇرمىستىق سۋ ۇنەمدەۋ بويىنشا ادىستەمەلىك نۇسقاۋلىق قابىلدانىپ، سۋ تۇتىنۋدىڭ ءتيىمدى ادىستەرى ۇسىنىلعان. بۇل نۇسقاۋلىقتا كراندارداعى اقاۋلاردى ۋاقىتىلى جوندەۋ، اەراسيالىق كرانداردى پايدالانۋ، ەكى تۇيمەلى سۋ اعىزۋ سيستەرنالارىن ورناتۋ، اۆتوماتتى سەنسورلىق سۋ ارالاستىرعىشتاردى قولدانۋ، كىر جۋاتىن ماشينانى تولىق جۇكتەمە كەزىندە عانا ىسكە قوسۋ سياقتى ءىس-شارالار قامتىلعان.
2024 جىلى ەلىمىزدىڭ 6 وڭىرىندە اۋىزسۋدى تاريفتەۋ ءتارتىبى قايتا قارالدى. الەۋمەتتىك نورمالار ەنگىزىلدى: ايىنا 3 م³-دەن ارتىق سۋ تۇتىنعان جاعدايدا، نورمادان اسىپ كەتكەن سۋ كولەمى ءۇشىن تاريف جوعارىلايدى. بۇل شارالار اقمولا، اقتوبە، تۇركىستان، ۇلىتاۋ وبلىستارى مەن الماتى جانە شىمكەنت قالالارىندا ايىنا ورتا ەسەپپەن 1،65 ملن تەكشە مەتر سۋ ۇنەمدەۋگە مۇمكىندىك بەردى. الەۋمەتتىك نورمالار ەنگىزىلگەنگە دەيىن اۋىزسۋ تۇتىنۋدىڭ ورتاشا كولەمى 21،1 ملن تەكشە مەتر بولعان بولسا، بۇگىنگى تاڭدا بۇل كورسەتكىش 19،5 ملن تەكشە مەترگە دەيىن تومەندەدى.
سۋ شارۋاشىلىعى ينفراقۇرىلىمىن جاڭعىرتۋ، سۋدى ۇنەمدەيتىن تەحنولوگيالاردى ەنگىزۋ، سۋدى ەسەپكە الۋ جۇيەسىن سيفرلاندىرۋ جانە حالىق پەن كاسىپورىندار اراسىندا سۋ ۇنەمدەۋ مادەنيەتىن دامىتۋ قازاقستان حالقىنا جوعارى ساپالى سۋمەن قامتاماسىز ەتۋگە مۇمكىندىك بەرەدى.