ق ر سۋ رەسۋرستارى جانە يرريگاسيا مينيسترلىگى سۋ ۇنەمدەۋ تاقىرىبىندا بالالاردىڭ رەسپۋبليكالىق سۋرەت جانە شىعارمالار بايقاۋىن ۇيىمداستىرادى.
بايقاۋعا 5 جاستان 16 جاسقا دەيىنگى كەز كەلگەن ۇمىتكەر قاتىسا الادى. «ۇزدىك سۋرەت» جانە «ۇزدىك شىعارما» قوس نوميناسياسىندا 2 جەڭىمپاز انىقتالادى. بارلىعى 4 قاتىسۋشى جۇلدەگەر بولادى. ۇزدىك جۇمىستاردىڭ اۆتورلارى باعالى سىيلىقتارمەن ماراپاتتالادى، دەپ حابارلايدى اlmaty-akshamy.kz.
بايقاۋ 2023 جىلدىڭ 25 جەلتوقسانىنا دەيىن جالعاسادى. جەڭىمپازداردى جاڭا جىل قارساڭىندا ق ر سۋ رەسۋرستارى جانە يرريگاسيا ءمينيسترى نۇرجان نۇرجىگىتوۆ ماراپاتتايدى. ۇمىتكەرلەردىڭ جۇمىستارى +77781345811 نومەرى بويىنشا WhatsApp ارقىلى، سونداي-اق Instagram-دا #سۋۇنەمدەۋبايقاۋى حەشتەگىمەن قابىلدانادى.
«سۋ رەسۋرستارى جانە يرريگاسيا مينيسترلىگىنىڭ جۇمىس باعىتتارىنىڭ ءبىرى - قازاقستاندىقتاردى سۋ ۇنەمدەۋ قاجەتتىلىگى جانە ونى ءتيىمدى پايدالانۋ ادىستەرى تۋرالى اقپاراتتاندىرۋ. وسى بايقاۋ ارقىلى ءبىز ادامداردىڭ، اسىرەسە وسكەلەڭ ۇرپاقتىڭ، وقۋشىلاردىڭ نازارىن وسى ماسەلەگە اۋدارعىمىز كەلەدى. سۋ ۇنەمدەۋ اۋىز سۋمەن قامتاماسىز ەتۋدەن باستاپ اۋىل شارۋاشىلىعىنا دەيىنگى كوپتەگەن باعىتتاردى قامتيدى، سوندىقتان بايقاۋعا قاتىسۋشىلاردىڭ شىعارماشىلىعى ءۇشىن شەكتەۋ جوق. ەرەكشە كوزگە تۇسكەن قاتىسۋشىلاردى مينيسترلىك باسشىسى ماراپاتتايدى»، - دەدى ق ر سۋ رەسۋرستارى جانە يرريگاسيا مينيسترلىگىنىڭ رەسمي وكىلى ءمولدىر ابدۋالييەۆا.