ق ر ەڭبەك جانە حالىقتى الەۋمەتتىك قورعاۋ مينيسترلىگى سۋ تاسقىنى سالدارىنان زارداپ شەككەن قازاقستاندىقتارعا كەشەندى قولداۋ شارالارىن كورسەتۋدە.
اتاۋلى الەۋمەتتىك كومەك تاعايىنداۋ مەن مۇگەدەكتىك توبىن قايتا كۋالاندىرۋ مەرزىمدەرى ۇزارتىلدى، سۋبسيديالاناتىن جۇمىس ورىندارىنا ورنالاستىرىلعاندار جالاقىسىن وزگەرىسسىز الادى، ال جاستاردى شاعىن نەسيلەندىرۋ باعدارلاماسى بويىنشا الىنعان كرەديتتەر بويىنشا قارىز الۋشىلارعا تولەمدەر كەيىنگە قالدىرىلادى. مينيسترلىك تاراپىنان قولداۋ شارالارىمەن بارلىعى 15 475 ادام قامتىلدى، دەپ حابارلايدى Almaty-akshamy.kz سالا مينيسترلىگىنە سىلتەمە جاساپ.
تج رەجيمى جاريالانعان قالالار مەن اۋدانداردا تۇراتىن 5،3 مىڭ وتباسىنا اتاۋلى الەۋمەتتىك كومەك مەملەكەتتىك ورگاندارعا جۇگىنۋدى بولدىرماستان اۆتوماتتى تۇردە تاعايىندالدى.
سونداي-اق، تج رەجيمىنىڭ قولدانىلۋ كەزەڭىندە مۇگەدەكتىگى بار 2،2 مىڭنان استام ادام ءۇشىن قايتا كۋالاندىرۋ مەرزىمدەرى اۆتوماتتى تۇردە ۇزارتىلدى، وسى شارامەن 4 مىڭعا جۋىق ادامدى، ونىڭ ىشىندە بالالاردى دا قامتۋ جوسپارلانۋدا. مۇگەدەكتىگى بويىنشا جاردەماقى تولەۋ بۇرىن بەلگىلەنگەن توپتار بويىنشا جۇزەگە اسىرىلادى.
توتەنشە جاعداي كەزەڭىندە تج رەجيمى جاريالانعان اۋداندار مەن قالالاردا سۋبسيديالاناتىن جۇمىس ورىندارىنا جۇمىسقا ورنالاسقان 8 مىڭعا جۋىق جۇمىسسىز ادامنىڭ جالاقىسىن ەڭبەك موبيلدىلىگى ورتالىقتارى جۇمىس بەرۋشىلەردەن مالىمەتتەردى تالاپ ەتپەي تولەيتىن بولادى.
سۋ تاسقىنىنان زارداپ شەككەن جاستاردى شاعىن نەسيەلەندىرۋ باعدارلاماسى بويىنشا قارىز الۋشىلارعا شاعىن نەسيەلەر بويىنشا تولەمدەردى كەيىنگە قالدىرۋ قامتاماسىز ەتىلىپ، باسقا دا مەملەكەتتىك قولداۋ شارالارى قاراستىرىلادى. 2024 جىلعا ارنالعان كەستەلەر بويىنشا بارلىق تولەمدەر 2025 جىلدان باستاپ قارجىلاندىرۋ كەزەڭىنىڭ سوڭىنا دەيىن كەلەسى تولەمدەرگە تەڭ ۇلەستەرمەن بولىنەدى.
سونىمەن قاتار، ەڭبەك جانە حالىقتى الەۋمەتتىك قورعاۋ مينيسترلىگى سيفرلىق دامۋ، يننوۆاسيالار جانە اەروعارىش ونەركاسىبى مينيسترلىگىمەن بىرلەسە وتىرىپ، «ەلەكتروندىق ۇكىمەت» ءموبيلدى قوسىمشاسىندا سۋ تاسقىنى سالدارىنان كەلتىرىلگەن زالالدى وتەۋگە وتىنىشتەر بەرۋ فۋنكسيونالدىعىن ەنگىزدى.