بۇل تۋرالى مادەنيەت جانە اقپارات ءمينيسترى ايدا بالايەۆا ايتتى.
مينيستر الاياقتار سۋ تاسقىنى جاعدايىن وزدەرىنىڭ جەكە ماقساتىنا پايدالانا باستاعانىن مالىمدەدى، دەپ حابارلايدى Almaty-akshamy.kz
«سۋ تاسقىنى تۋرالى جالعان اقپاراتتىڭ ماقساتى – دۇربەلەڭ تۋدىرىپ، قازاقستاندىقتاردى جىككە ءبولىپ، اداستىرۋ. ءقازىر ەلىمىزدەگى سۋ تاسقىنىمەن كۇرەس قارقىندى ءجۇرىپ جاتىر جانە ونىڭ ءقاۋپى ءالى باسەڭدەگەن جوق. قارعىن سۋمەن كۇرەسكە قولداعى بارلىق كۇش پەن رەزەرۆ، ادام رەسۋرسى مەن قاجەتتى تەحنيكالار تۇگەل جۇمىلدىرىلدى. سۋ باسقان وڭىرلەردىڭ تۇرعىندارى، ولارمەن بىرگە جيىرما مىڭنان استام ۆولونتەر مەملەكەتتىك ورگاندارمەن بىرىگىپ جۇمىس ىستەپ جاتىر»، دەپ جازدى مادەنيەت جانە اقپارات ءمينيسترى ايدا بالايەۆا.
ءمينيستردىڭ ايتۋىنشا، اپاتتار مەن سۋ تاسقىنى تۋرالى جالعان حابارلارعا بايلانىستى قۇتقارۋ بريگادالارىنىڭ جۇمىس كۇشى قاجەت ەمەس جەرلەرگە باعىتتالعان جاعدايلار دا بولعان. سونىڭ كەسىرىنەن ۋاقىت تەككە كەتىپ، رەسۋرستار پايداسىز شىعىن بولىپ، اقپارات سالاسىنا جۇرگىزىلگەن مونيتورينگ بارىسىندا جالعان اقپارات بولىپ شىققان 29 فاكتى انىقتالعانىن مالىمدەدى.
كوپ تاراعان جالعان اقپاراتتار قاتارىنا بوگەتتەردىڭ بۇزىلۋى، رەسپۋبليكالىق ماڭىزى بار جولداردى سۋ باسۋى، سۋ قويمالارىنداعى، ەلەكتر ستانسيالارىنداعى جانە باسقا دا ستراتەگيالىق وبەكتىلەردەگى اپاتتار، اۋىز سۋدىڭ لاستانۋى، ەۆاكۋاسيالاۋ ورىندارى، قاراجات جيناۋ جانە تولەۋ تۋرالى جالعان مالىمەتتەر جاتادى.
"ماسەلەن، اقتوبەدەگى سۋ قويماسى شليۋزدەرىن اشۋ تۋرالى الەۋمەتتىك جەلىدە جالعان اقپارات تارادى. ونى كەيىن اقتوبە وبلىسىنىڭ اكىمدىگى جوققا شىعاردى"، - دەپ مىسال كەلتىردى مينيستر.
قوستاناي وبلىسىنىڭ اكىمدىگى ب.مايلين اۋدانىنداعى ايات وزەنى ارقىلى وتەتىن كوپىردىڭ ءبىر بولىگىنىڭ قۇلاۋى، سونداي-اق وڭىردەگى مال قورىمدارىن سۋ باسقانى تۋرالى حابارلامانى رەسمي تۇردە جوققا شىعاردى.
ول وسى فاكتىلەر بويىنشا توتەنشە جاعداي قىزمەتكەرلەرى سول جەرلەرگە ارنايى بارعانىمەن، اقپاراتتىڭ راستالماعانىن ايتتى.
"بۇل كەزدە باسقا جەرلەردەگى كومەككە شىن مۇقتاج جاندار كۇتىپ وتىراتىنىن، ولاردىڭ اراسىندا بالالاردىڭ بار بولۋى مۇمكىن ەكەنىن ۇمىتپايىق"، - دەدى مينيستر.
دەنساۋلىق ساقتاۋ مينيسترلىگى دە سۋ باسقان اۋماقتاردا جۇقپالى اۋرۋلاردىڭ ءورشۋ ءقاۋپى جانە ەپيدەميولوگيالىق قىزمەت تاراپىنان جاعدايدى باقىلاۋدىڭ جەتكىلىكسىزدىگى تۋرالى جالعان اقپارات تاراعانىن مالىمدەپ وتىر، دەيدى بالايەۆا.
بالايەۆا تاسقىننان زارداپ شەككەندەرگە ارنالعان تولەمدەر تۋرالى دا ادەيى جالعان حابارلامالار تاراتۋ ۇلكەن ءقاۋىپ توندىرەتىنىن ايتتى.
"سوڭعى كۇندەرى سۋ تاسقىنىنان زارداپ شەككەندەرگە مەملەكەت باسشىسى تاراپىنان ۋادە ەتىلەدى دەگەن ميلليونداعان دوللار تولەمدەرى، پرەمەر-مينيستر مەن ۇكىمەت مۇشەلەرىنىڭ اتىنان اقشالاي قاراجات جيناۋ تۋرالى جالعان حابارلامالار پايدا بولدى"، - دەدى اقپارات ءمينيسترى.
بالايەۆا مۇنداي اقپاراتقا سەنبەۋگە شاقىرىپ، الاياقتار سۋ تاسقىنى جاعدايىن وزدەرىنىڭ جەكە ماقساتىنا پايدالانا باستاعانىن مالىمدەدى.
"ولار قازاقستاندىقتاردىڭ جەكە دەرەكتەرى مەن قارجى رەسۋرستارىن انىقتاۋ ءۇشىن ينتەرنەتتە "تولەمدەردى ءبىلۋ ءۇشىن ءجسن-دى تەكسەرىڭىز"، "3 ميلليون تەڭگەگە دەيىن وتەماقى الۋ"، "مەملەكەتتەن مۇمكىندىگىنشە تەزىرەك جاردەماقى الۋ" دەگەن سياقتى حابارلامالار جاريالايدى"، - دەپ جازدى مينيستر.
بالايەۆانىڭ ايتۋىنشا، جارنامالارىن سەنىمدى كورسەتۋ ءۇشىن قىلمىسكەرلەر قازاقستاندىق بانكتەر مەن مەملەكەتتىك مەكەمەلەردىڭ اتاۋىن پايدالانادى. ول مۇنداي كورىنەۋ جالعان حابارلامالاردىڭ بارلىعى مەملەكەتتىك ورگاندار ارقىلى جەدەل جوققا شىعارىلىپ، بارلىق فاكتى بويىنشا قۇقىق قورعاۋ ورگاندارىنا حابارلامالار جىبەرىلگەنىن مالىمدەدى.
بارلىق انىقتالعان زاڭسىز فاكتىگە قۇقىقتىق باعا بەرۋ، جەدەل-ىزدەستىرۋ جانە ءىس جۇرگىزۋ ءۇشىن ماتەريالدار قۇقىق قورعاۋ ورگاندارىنا جولداندى، دەيدى مينيستر.
"سوندىقتان تەك رەسمي جانە راستالعان اقپاراتقا سەنىڭىزدەر. بارلىق كۇماندى فاكتىنى بىرنەشە رەت تەكسەرىڭىز جانە كۇماندى حابارلامالاردى ارى قاراي تاراتپاڭىز"، - دەپ ەسكەرتتى بالايەۆا.