وقيعانىڭ جاي-جاپسارى انىقتالىپ جاتىر.
باتىس قازاقستان وبلىسى بوكەي ورداسى اۋدانىندا مىڭنان اسا كيىك قىرىلىپ قالعان، دەپ حابارلايدى Almaty-akshamy.kz
بوكەي ورداسى اۋدانىنىڭ اكىمى نۇرلىبەك داۋموۆتىڭ ايتۋىنشا، وقيعا 12 ءساۋىر كۇنى كەشكىسىن مۇراتساي اۋىلدىق وكرۋگىندە بولعان. كيىكتەردىڭ ولەكسەسى اۋىل ماڭىنداعى مۇراتساي سۋ قويماسىنان تابىلعان.
«ءساۋىر ايىندا وسى مۇراتساي اۋىلىنىڭ تۇسىمەن كيىكتەر جانىبەك اۋدانىنا قاراي تولدەۋ ءۇشىن وتەدى. ءالسىز بولدى ما، الدە ءبىرىن-بىرى تاپاپ ءولتىردى مە، سەبەبى بەلگىسىز. قازىرگى كەزدە «وحوتزووپروم» مەكەمەسى، «بوكەي ورداسى» تابيعي رەزەرۆاتى، اۋدان جانە اۋىل اكىمدىگى قىزمەتكەرلەرى، ۆەتەرينار ماماندار سۋدان ولەكسەلەردى شىعارىپ، شۇڭقىرعا كومىپ جاتىر. جاڭگىر حان اتىنداعى باتىس قازاقستان اگرارلىق-تەحنيكالىق ۋنيۆەرسيتەتىنەن عالىمدار كەلەدى، اۋداندىق سانيتارلىق-ەپيدەميولوگيالىق باسقارما قىزمەتكەرلەرى سۋدان سىناما الدى. جاعداي باقىلاۋدا. وقيعانىڭ جاي-جاپسارى انىقتالادى»، دەدى ن.داۋموۆ.