ق ر توتەنشە جاعدايلار ءمينيسترى سىرىم ءشارىپحانوۆ بارلىق اكىمدىكتەرگە سۋ تاسقىنى قاۋپىنە دايىن بولۋدى تاپسىردى.
بۇل تۋرالى مينيستر ۇكىمەت وتىرىسىندا ايتتى، دەپ حابارلايدى Almaty-akshamy.kz.
«بيىل باتىس قازاقستان وبلىسىندا 210 تۇرعىن ءۇي، اقتوبە وبلىسىندا – 89 تۇرعىن ءۇي، قوستاناي وبلىسىندا – 44 تۇرعىن ءۇي سۋ استىندا قالدى. بۇل رەتتە اقتوبە جانە باتىس قازاقستان وبلىستارىندا 46 ءۇي تۇرۋعا جارامسىز دەپ تانىلدى. ناتيجەسىندە اقتوبە وبلىسىنىڭ اكىمدىگى 24 ءۇي، باتىس قازاقستان وبلىسىندا – 16 ءۇي سالىندى. جالپى 1،3 ملرد تەڭگە جۇمسالدى. جىل سايىن ىقتيمال ءقاۋىپ پەن ۇلكەن ماتەريالدىق شىعىنعا ۇشىراعانشا، وسى قاراجاتتى الدىن-الا ەسكەرتۋ ءۇشىن پايدالانۋعا بولار ەدى»، - دەدى تج ءمينيسترى.
سونىمەن بىرگە، س. ءشارىپحانوۆ سۋ باسۋ ءقاۋپى ساقتالىپ وتىرعان وڭىرلەردى اتادى.
«اقتوبە وبلىسىندا سۋ باسقان ەكى ەلدى مەكەننىڭ (قوبدا، قاراتال) قالپىنا كەلتىرۋ جۇمىستارى تەك بىرەۋىندە (قاراتال) عانا اياقتالدى. تۇركىستان، جامبىل جانە الماتى وبلىستارىندا سۋ باسۋ فاكتىلەرى جىل سايىن ارىق جۇيەلەرىنىڭ دايىن بولماۋىنا بايلانىستى تىركەلەدى. قوستاناي وبلىسىندا جوسپارلانعان جول كارتاسىنىڭ جارتىسى بويىنشا عانا جۇمىس باستالدى. وسى ايتىلعانداردى، جالپى كليماتتىڭ وزگەرۋى بويىنشا الەمدىك ءۇردىستى جانە وسى كوكتەمدە باتىس وڭىرىندە سۋ تاسقىنى ءبىر اي بۇرىن باستالعانىن ەسكەرىپ، بارلىق اكىمدىكتەر سىن-قاتەرگە دايىن بولۋى قاجەت»، - دەپ كەڭەس بەردى مينيستر.
سالا ءمينيسترىنىڭ ايتۋىنشا، وتكەن جىلدارداعى سۋ تاسقىنىن بولدىرماۋ ءۇشىن اكىمدىكتەر بيىلعى سۋ تاسقىنىنا قارسى شارالارعا بارلىق قاجەتتى رەسۋرستاردى تارتۋى قاجەت.
«ەكىنشىدەن، بيىل جول كارتاسى اياقتالاتىنىن ەسكەرىپ، ورىندالماعان شارالار الەۋمەتتىك-ەكونوميكالىق دامۋدىڭ كەشەندى جانە وڭىرلەردىڭ دامۋ جوسپارلارىنا اۋىستىرىلسىن. ەكولوگيا جانە تابيعي رەسۋرستار مينيسترلىگى گيدروتەحنيكالىق قۇرىلىستاردى ۋاقىتىلى جوندەۋى كەرەك. يندۋستريا جانە ينفراقۇرىلىمدىق دامۋ مينيسترلىگىنە سۋ وتكىزۋ قۇرىلىستارىن، جولدار مەن كوپىرلەردى تاسقىن جانە ەرىگەن سۋلاردىڭ جوعارى كولەمىن وتكىزۋگە دايىنداۋ قاجەت. تج مينيسترلىگى اقپارات جانە قوعامدىق دامۋ مينيسترلىگىمەن، اكىمدىكتەرمەن بىرلەسىپ ازاماتتاردىڭ قاۋىپسىزدىك مادەنيەتىن ارتتىرۋ ءۇشىن ارىقتاردى تازارتۋ جانە قاردى ۋاقتىلى شىعارۋ بويىنشا حالىقپەن ءتيىستى اقپاراتتىق جۇمىستى جالعاستىرسىن»، - دەدى سىرىم ءشارىپحانوۆ.