ازاماتتىق قورعاۋ قىزمەتتەرىمەن اتىراۋ، اقتوبە، باتىس قازاقستان جانە سولتۇستىك قازاقستان وبلىستارىندا سۋ تاسقىنىنا قارسى ءىس-شارالار، سۋ تاسقىنى سالدارىن جويۋ جانە حالىققا كومەك كورسەتۋ بويىنشا جۇمىستار جالعاسۋدا.
باتىس قازاقستان وبلىسىندا جاعداي تۇراقتالدى. سۋ باسقان ساياجاي اۋماقتارىنا مونيتورينگ جۇرگىزۋ جالعاسۋدا. توتەنشە جاعدايلار جانە پوليسيا دەپارتامەنتىنىڭ قىزمەتكەرلەرى بىرلەسىپ، سۋ باسقان اۋماقتاردى پاترۋلدەۋدە.
كومەككە كەلگەن اقتوبە، تۇركىستان وبلىستارى توتەنشە جاعدايلار دەپارتامەنتتەرىنىڭ جەكە قۇرامىنان قۇرىلعان جيىنتىق توپتاردىڭ كۇشتەرى مەن قۇرالدارى جايىق وزەنىنىڭ بويىندا ورنالاسقان ەلدى مەكەندەردە سۋ تاسقىنىنا قارسى ءىس-شارالار جۇرگىزۋ ءۇشىن باتىس قازاقستان وبلىسىنان اتىراۋ وبلىسىنا جىبەرىلدى.
اتىراۋ وبلىسىندا جايىق وزەنىنىڭ مونيتورينگى جالعاسۋدا، سۋدىڭ دەڭگەيى كوتەرىلگەنى بايقالادى. سۋ تاسقىنىنان قورعاۋ ماقساتىندا اتىراۋ قالاسىندا بوگەتتەردى نىعايتۋ جۇمىستارى ۇزدىكسىز جۇرگىزىلىپ جاتىر. بۇگىنگى تاڭدا ۇزىندىعى 240 كم قورعانىس بوگەتتەرىن نىعايتۋ جۇرگىزىلدى. بۇعان دەيىن كومەككە كەلگەن كۇشتەر مەن قۇرالدار ۋچاسكەلەرگە ءبولىنىپ، قاجەتتى جۇمىستاردى اتقارۋدا.
سولتۇستىك قازاقستان، اتىراۋ جانە اقتوبە وبلىستارىندا 6 082 تۇرعىن ءۇي مەن 2 584 اۋلا اۋماعىنان سۋدىڭ باعىتى بۇرىلىپ، سۋ سورىلدى. رەسپۋبليكا بويىنشا 35 122 ادام ءوز ۇيلەرىنە ورالدى. 8 520 ادام ەۆاكۋاسيالاۋ پۋنكتتەرىندە.
اۆاريالىق-قۇتقارۋ جانە سۋ تاسقىنىنا قارسى جۇمىستارعا 25 مىڭنان استام ادام، 3 مىڭ تەحنيكا، 634 سۋ سورۋ قۇرالى، 268 ءجۇزۋ قۇرالى، 14 اۋە كەمەسى جۇمىلدىرىلدى.