سۋ رەسۋرستارى جانە يرريگاسيا مينيسترلىگى 2024 جىلى ەلىمىزدىڭ سۋ شارۋاشىلىعى نىساندارىن دامىتۋ بويىنشا 137 جوبانى ىسكە اسىرۋدى باستادى.
سونداي-اق، 201 جوبا بويىنشا جوبالاۋ-سمەتالىق قۇجاتتاما ازىرلەنىپ جاتىر، دەپ حابارلايدى aqshamnews.kz سالا مينيسترلىگىنە سىلتەمە جاساپ.
اتاپ ايتقاندا، 700 مىڭ گەكتاردان استام سۋارمالى جەردى قالپىنا كەلتىرۋ جانە جاقسارتۋ، سونداي-اق جالپى ۇزىندىعى 7000 شاقىرىم كانال سالۋ جانە رەكونسترۋكسيالاۋ جۇمىسى جۇرگىزىلۋدە.
«بۇل جۇمىستار سۋ رەسۋرستارىن باسقارۋ جۇيەسىن دامىتۋدىڭ 2024-2030 جىلدارعا ارنالعان تۇجىرىمداماسىنا جانە سۋ سالاسىن دامىتۋدىڭ 2024-2028 جىلدارعا ارنالعان كەشەندى جوسپارىنا ساي جۇرگىزىلۋدە. بۇدان بولەك، اتالعان قۇجاتتاردا ءونىمسىز شىعىنداردى ازايتۋ جانە قوسىمشا سۋ كولەمىن جيناۋ بويىنشا دا كوپتەگەن ءىس-شارالار قاراستىرىلعان. مىسالى، 2024 جىلى اقتوبە سۋ قويماسىن رەكونسترۋكسيالاۋ جۇمىستارى اياقتالدى. تۇركىستان وبلىسىنداعى بايدىبەك-اتا جانە قاراقۋىس سۋ قويمالارىنىڭ قۇرىلىسى، سونداي-اق قاپشاعاي جانە كيروۆ سۋ قويمالارىن رەكونسترۋكسيالاۋ باستالدى»،- دەدى ق ر سۋ رەسۋرستارى جانە يرريگاسيا مينيسترلىگى سۋ رەسۋرستارىن رەتتەۋ، قورعاۋ جانە پايدالانۋ كوميتەتى ءتوراعاسىنىڭ ورىنباسارى گۇلميرا يماشيەۆا.