سۋ سالاسىن دامىتۋدىڭ ءۇش جىلدىق جوباسىن ازىرلەۋ كەرەك – پرەزيدەنت

ءبىلىمدى ساراپشىلاردى جۇمىسقا تارتۋ كەرەك.

سۋ سالاسىن دامىتۋدىڭ ءۇش جىلدىق جوباسىن ازىرلەۋ كەرەك. بۇل جايىندا ق ر پرەزيدەنتى قاسىم-جومارت توقايەۆ قازاقستان حالقىنا جولداۋىندا ايتتى، دەپ حابارلايدى Almaty-akshamy.kz.

«ەل ەكونوميكاسىن تۇراقتى دامىتۋعا سۋ تاپشىلىعى قاتتى كەدەرگى بولىپ وتىر. ءقازىر بۇل ۇلتتىق قاۋىپسىزدىك ماسەلەسىنە اينالدى. سىرتتان كەلەتىن سۋ ازايىپ بارادى. سول سۋدىڭ ءوزىن ءتيىمسىز پايدالانۋ جاعدايدى ودان ءارى ۋشىقتىرىپ وتىر. سۋدىڭ 40 پايىزى قۇمعا ءسىڭىپ جاتىر. بۇل سالادا باسقا دا تۇيتكىلدەر از ەمەس. اتاپ ايتقاندا، ينفراقۇرىلىم ابدەن توزعان. سونداي-اق، اۆتوماتتاندىرۋ جانە سيفرلاندىرۋ دەڭگەيى تومەن. عىلىمي نەگىزدەمە جوق، ماماندار تاپشى»، - دەپ اتاپ ءوتتى مەملەكەت باسشىسى.

ق ر پرەزيدەنتىنىڭ اتاپ وتۋىنشە، بۇل ماسەلەلەردى شەشۋ ءۇشىن ۇكىمەت جانىنداعى سۋ كەڭەسىنىڭ جۇمىسىن جانداندىرۋ قاجەت، ءبىلىمدى ساراپشىلاردى جۇمىسقا تارتۋ كەرەك

«قاجەتتى مامانداردى دايارلاۋ ءۇشىن بۇل سالاداعى ىرگەلى ءارى مىقتى جوعارى وقۋ ورنىن انىقتاعان ءجون. سۋ سالاسىن دامىتۋدىڭ ءۇش جىلدىق جوباسىن ازىرلەۋ كەرەك»، - دەپ اتاپ ءوتتى قاسىم-جومارت توقايەۆ.