ىشكى اۋديت قورىتىندىسىنا ساي جامبىل وبلىسى بويىنشا «قازسۋشار» فيليالىنىڭ ديرەكتورى مەن اسا وندىرىستىك ايماعىنىڭ باسشىسى قىزمەتىنەن بوساتىلدى.
بۇدان بولەك، فيليال ديرەكتورىنىڭ ورىنباسارى مەن قورداي، بايزاق، مەركى وندىرىستىك ايماقتارىنىڭ باسشىلارى قاتاڭ سوگىس تۇرىندە تارتىپتىك جاۋاپكەرشىلىككە تارتىلدى، دەپ حابارلايدى aqshamnews.kz سۋ رەسۋرستارى جانە يرريگاسيا مينيسترلىگىنە سىلتەمە جاساپ.
ەسكە سالساق، وسىعان دەيىن سۋ رەسۋرستارى جانە يرريگاسيا ءمينيسترى نۇرجان نۇرجىگىتوۆتىڭ تاپسىرماسى بويىنشا مينيسترلىكتىڭ ىشكى اۋديت دەپارتامەنتى جامبىل وبلىسى بويىنشا «قازسۋشار» فيليالىنا تەكسەرىس جۇرگىزگەن بولاتىن. انىقتالعان قۇقىق بۇزۋشىلىقتاردى ودان ءارى قاراۋ ءۇشىن اۋديت ماتەريالدارى ق ر باس پروكۋراتۋراسىنا جىبەرىلدى.
بۇل جۇمىستار سۋدىڭ «كولەڭكەلى» نارىعىمەن، سۋ سالاسىنداعى زاڭسىز ارەكەتتەرمەن كۇرەسۋ جانە ءتارتىپ پەن اشىقتىقتى قامتاماسىز ەتۋ ءۇشىن جۇزەگە اسىرىلۋدا. ايتا كەتۋ كەرەك، مەكەمەنىڭ وزگە ايماقتارداعى فيليالدارىندا دا تەكسەرىس جۇرگىزىلەدى.
مينيسترلىك ماماندارى جامبىل وبلىسىندا جۇرگىزگەن اۋديت بارىسىندا سۋ رەسۋرستارىن زاڭسىز پايدالانۋدىڭ 10-عا جۋىق فاكتىسىن، سونداي-اق شارۋالارمەن سۋارمالى سۋ بەرۋ كەلىسىمشارتتارىن جاساۋ بارىسىندا زاڭ بۇزۋشىلىقتارعا جول بەرگەنىن انىقتاعان بولاتىن.
«سۋ رەسۋرستارىن زاڭسىز پايدالانۋ فاكتىلەرىمەن كۇرەس جالعاسادى. ول ءۇشىن مەنىڭ تاپسىرمام بويىنشا مينيسترلىك جانىنان ارنايى كوميسسيا قۇرىلىپ، «قازسۋشار» فيليالدارى مەن باسسەيندىك ينسپەكسيالارعا تەكسەرىس جۇرگىزەدى. زاڭسىز ارەكەتتەرگە مىندەتتى تۇردە توسقاۋىل قويىلىپ، قۇقىق بۇزۋشىلار مەن لاۋازىمدى قىزمەتكەرلەر جاۋاپكەرشىلىككە تارتىلادى. ءبىز سۋ رەسۋرستارىن پايدالانۋدى باقىلاۋدى كۇشەيتەمىز»، - دەدى سۋ رەسۋرستارى جانە يرريگاسيا مينيسترلىگىنىڭ اپپارات كەڭەسىندە ۆەدومستۆو باسشىسى نۇرجان نۇرجىگىتوۆ.