ەلىمىزدەگى ەڭ ءىرى Kitap Fest Almaty كىتاپ فەستيۆالى ونجىلدىق مەرەيتويىن اتاپ وتۋدە
مادەني استانانىڭ كىتاپسۇيەر قاۋىمى ەكى كۇن ىشىندە Kitap Fest Almaty الاڭىندا سەگىز مىڭنان استام كىتاپ ساتىپ الدى. ەكى كۇنگە ارنالعان باعدارلاما قالا كۇنىن مەرەكەلەۋ اياسىندا ازىرلەندى جانە ءبارىنىڭ قالاداعى سۇيىكتى ورنى – ارباتتا ءوتتى، دەپ حابارلايدى aqshamnews.kz
اتاپ وتەتىنى، ەڭ ءىرى كىتاپ فەستيۆالى بيىل ءوزىنىڭ ونجىلدىق مەرەيتويىن اتاپ وتۋدە. وسى ۋاقىت ارالىعىندا بۇل جوبا كىتاپقا دەگەن سۇيىسپەنشىلىكتىڭ سيمۆولىنا اينالدى جانە ءوزىن كىتاپ وقۋ مادەنيەتىن ىلگەرىلەتۋ ءۇشىن بىرەگەي پلاتفورما رەتىندە كورسەتە وتىرىپ، ەلىمىزدەگى كىتاپ مادەنيەتىن دامىتۋداعى ماڭىزدى كەزەڭ بولدى.
«Kitap festء-تىڭ باسقا فەستيۆالدەردەن ايىرماشىلىعى نەدە؟ بىرىنشىدەن، بۇل قازاقستانداعى جالعىز كىتاپ فەستيۆالى. ەكىنشىدەن، بۇل جاي عانا كىتاپ جارمەڭكەسى ەمەس. ءبىز كىتاپ وقۋ مادەنيەتى مەن ونى وقۋعا دەگەن سۇيىسپەنشىلىكتى ناسيحاتتايمىز. ءبىز كىتاپ وقۋدى تانىمال جانە وتە قاجەتتى ەتە تۇسپەكشىمىز. سول ءۇشىن دە كىتاپسۇيەر قاۋىمدى، اۆتورلاردى جانە ادەبيەت سالاسىنداعى جەتەكشى ساراپشىلاردىڭ باسىن قوستىق»، - دەپ اتاپ ءوتتى Kitap Fest Almaty فەستيۆالىنىڭ نەگىزىن قالاۋشى جۇلدىز وماربەك.
فەستيۆال قاتىسۋشىلارى ەكى كۇن ىشىندە كوپتەگەن ينتەراكتيۆتى الاڭدار: قازاقستاندىق جازۋشىلارمەن كەزدەسۋلەر، بالالارعا ارنالعان قىزىقتى شەبەرلىك سىنىپتارى، كورمەلەر مەن زياتكەرلىك بايقاۋلار ارقىلى كىتاپتار الەمىنە ەنىپ ۇلگەردى. فەستيۆال بارىسىندا 70-تەن استام كىتاپ دۇكەندەرى مەن باسپالار قالا تۇرعىندارىنا بارلىق تالعامعا ساي كىتاپتار ۇسىندى. سونداي-اق، جوبا قاتىسۋشىلارى بەلگىلى تۇلعالارمەن كەزدەسۋلەر وتكىزىپ، ەركىن فورماتتا قازىرگى ادەبيەتتەگى ترەندتەر تۋرالى اڭگىمەلەستى.
«ءبىزدىڭ باسپا جوباعا العاش رەت قاتىسىپ وتىر. ءبىزدىڭ بايقاۋىمىزشا، كوركەم ادەبيەت، بالالار ادەبيەتى، نونفيكس جانرى وتە جاقسى دامىعان. الايدا، مەنىڭ ويىمشا، ءالى دە عىلىمي ادەبيەتتەر از. سوندىقتان ءبىز وسى باعىتتا دامۋ قاجەت دەپ شەشتىك. كەلگەن قوناقتار مەن وقىرمانداردىڭ شىنايى كوزقاراسى مەن قىزىعۋشىلىعى ءبىزدى بەي-جاي قالدىرا المايدى. جىل سايىن وسى فەستيۆالگە قاتىسامىز دەگەن ۇمىتتەمىز»، - دەپ ءبولىستى باسپالاردىڭ ءبىرىنىڭ ديرەكتورى سادىق شەرىمبەك.
Kitap Fest Almaty كىتاپ وقۋ مادەنيەتى جاي عانا حوببي ەمەس، تاربيە مەن ءبىلىم بەرۋدىڭ ماڭىزدى ەلەمەنتى ەكەنىن تاعى دا كورسەتتى. فەستيۆال تەك مادەني مەرەكە عانا ەمەس، سونىمەن قاتار ءبىلىمدى جانە كىتام وقيتىن قوعام قۇرۋعا باعىتتالعان ماڭىزدى قادام بولدى. فەستيۆالگە كەلگەن كوپتەگەن ادامدار مۇنداي شارالاردىڭ كىتاپقا دەگەن قىزىعۋشىلىقتىڭ ارتۋىنا ىقپال ەتەتىنىن جانە جاڭا جەتىستىكتەرگە شابىتتاندىراتىنىن ايتتى.