قازاقستاننىڭ 9 وبلىسىندا سۋ قويمالارى كۇردەلى جوندەۋ جۇمىستارى جۇرگىزىلەتىن بولادى.
ق ر سۋ رەسۋرستارى جانە يرريگاسيا مينيسترلىگى ازىرلەگەن سۋ شارۋاشىلىعىن دامىتۋدىڭ 2024-2030 جىلدارعا ارنالعان كەشەندى جوسپارى شەڭبەرىندە ەلىمىزدەگى 15 سۋ قويماسى رەكونسترۋكسيادان وتەدى، دەپ حابارلايدى Almaty-akshamy.kz.
مينيسترلىكتىڭ مالىمەتىنشە، بۇل نىسانداردىڭ جالپى كولەمى 1،9 تەكشە شاقىرىمدى قۇرايدى.
اتالعان سۋ قويمالارىن رەكونسترۋكسيالاۋ 70 مىڭ ادام تۇراتىن 64 ەلدىمەكەندى سۋ باسۋ ءقاۋپىن ازايتۋعا، سونداي-اق 74 مىڭ گا سۋارمالى جەرگە سۋ بەرۋدى جاقسارتۋعا مۇمكىندىك بەرەدى
«سۋ رەسۋرستارى جانە يرريگاسيا ءمينيسترى رەتىندە جۇمىس ىستەگەن 3 ايدا ەلىمىزدىڭ 10 وبلىسىنا بارىپ، سۋ قويمالارىن جانە باسقا دا ماڭىزدى سۋ ينفراقۇرىلىمى نىساندارىن ارالادىم. وتكەن اپتادا اۋديتورلىق پالاتا باسشىسى ۇزاق جىلداردان كەيىنگى تەكسەرىس ناتيجەلەرىن جاريالادى. الدا گيدروتەحنيكالىق نىسانداردى قالپىنا كەلتىرۋ، تەحنولوگيالاردى ەنگىزۋ سىندى جانە ت.ب. كوپتەگەن جۇمىس تۇر. گيدروتەحنيكالىق قۇرىلىستار 30 جىلدان 50 جىلعا دەيىن كۇردەلى جوندەۋسىز جانە رەكونسترۋكسياسىز پايدالانىلۋدا، سوندىقتان قاۋىپتىلىگى جوعارى نىساندار بولىپ تابىلادى. كوممۋنالدىق جانە جەكە مەنشىكتەگى جەكەلەگەن قۇرىلىستارداعى جاعداي اسا كۇردەلى»، – دەدى ق ر سۋ رەسۋرستارى جانە يرريگاسيا ءمينيسترى نۇرجان نۇرجىگىتوۆ.
جۇمىس ىستەپ تۇرعان نىسانداردى جوندەۋمەن قاتار، كەشەندى جوسپار قازاقستاننىڭ 9 وبلىسىندا كولەمى 2،4 تەكشە شاقىرىم بولاتىن 20 جاڭا سۋ قويماسىن سالۋدى دا كوزدەيدى. جوسپاردى ىسكە اسىرۋ سۋ رەسۋرستارىنىڭ كولەمىن 3،7 تەكشە شاقىرىمعا ۇلعايتۋعا، سۋارمالى جەرلەردىڭ اۋماعىن 2،2 ملن گەكتارعا دەيىن كەڭەيتۋگە، سۋارمالى سۋدىڭ جىل سايىنعى شىعىنىن ازايتۋعا جانە ونىڭ كولەمىن 3 تەكشە شاقىرىمعا دەيىن ۇلعايتۋعا مۇمكىندىك بەرەدى.