سۋ باسقان ايماقتار باقىلاۋدا

توتەنشە جاعدايلار ءمينيسترى اقتوبەنىڭ سۋ باسقان اۋدانىنا اتتاندى.

قازاقستان تجم باسشىسى يۋريي يلين جاعدايدى باعالاۋ، اقتوبە وبلىسىنىڭ ەلدى مەكەندەرىندەگى سۋ تاسقىنىنىڭ سالدارىن جويۋ جۇمىسىن باقىلاۋ جانە ۇيلەستىرۋ ءۇشىن اقتوبە وبلىسىنا اتتاندى، دەپ حابارلايدى اlmaty-akshamy.kz تجم تەلەگرام كانالىنا سىلتەمە جاساپ.

تەمپەراتۋرانىڭ كۇرت جوعارىلاۋى جانە قاردىڭ قارقىندى ەرۋى سالدارىنان قوبدا جانە ويىل اۋداندارىنىڭ ەلدى مەكەندەرىن سۋ باسقان ەدى. قۇتقارۋشىلار مەن جەرگىلىكتى اتقارۋشى ورگانداردىڭ كۇشىمەن الدىن الا 400-دەن استام ادام ەۆاكۋاسيالاندى. 

قازىرگى ۋاقىتتا بۇرىن ەۆاكۋاسيالانعان 140 ادام ۇيىنە ورالدى، 70-تەن استام ادام ۋاقىتشا ەۆاكۋاسيالاۋ پۋنكتىندە، 240-تان استام ادام تۋىستارىنىڭ ۇيىندە.

4 000-نان استام اۋىل شارۋاشىلىعى جانۋارلارى ءقاۋىپسىز جەرگە ايدالدى.

وبلىستىڭ اتالعان اۋداندارىندا جۇرگىزىلىپ جاتقان اۆاريالىق-قۇتقارۋ جانە شۇعىل جۇمىستارعا، سۋ تاسقىنى سالدارىن جويۋعا تجم قۇتقارۋ بولىمشەلەرىنىڭ، جەرگىلىكتى اتقارۋشى ورگاندار، ءىىم جانە وبلىستىڭ باسقا دا مۇددەلى قۇرىلىمدار جەكە قۇرامىنان 900-گە جۋىق ادام، 650 تەحنيكا، سونىڭ ىشىندە سۋ سورۋ قۇرالدارى جۇمىلدىرىلدى.