نارحوز ۋنيۆەرسيتەتىنىڭ بولاشاق جاتاقحاناسىنىڭ ورنىنا ەسكەرتكىش تاس قويىلدى
جاڭا جاتاقحانانىڭ ەسكەرتكىش تاسىن قالاۋ راسىمىنە ۋنيۆەرسيتەت باسشىلىعىمەن بىرگە قازاقستان رەسپۋبليكاسىنىڭ عىلىم جانە جوعارى ءبىلىم ءمينيسترى ساياسات نۇربەك پەن الماتى قالاسى اكىمىنىڭ ورىنباسارى ارمان قىرىقبايەۆ قاتىستى، دەپ حابارلايدى almaty-akshamy.kz
«جىل سايىن مەكتەپ بىتىرۋشىلەر سانى ارتىپ، جاڭا جاتاقحاناعا دەگەن قاجەتتىلىك كۇن ساناپ ارتىپ كەلەدى. Narxoz ۋنيۆەرسيتەتىنىڭ رەزيدەنت ەمەس ستۋدەنتتەردى باسپانامەن قامتاماسىز ەتۋ مىندەتىن ءساتتى ورىنداپ كەلە جاتقانىن اتاپ وتكىم كەلەدى. الداعى ۋاقىتتا دا وسى بيىك ستاندارت ساقتالىپ، جاڭا جاتاقحانا ستۋدەنتتەرىمىزدىڭ تىڭ عىلىمي يدەيالارىنىڭ، جوبالارىنىڭ، جەتىستىكتەرىنىڭ باستاۋىنا اينالادى دەپ سەنەمىن»، - دەدى ساياسات نۇربەك ءوز سوزىندە.
- «الماتى قالاسىن دامىتۋ باعدارلاماسىنىڭ «جول كارتاسى» اياسىندا 2025 جىلدىڭ سوڭىنا دەيىن 12 مىڭ، 2030 جىلدىڭ سوڭىنا قاراي تاعى 20 مىڭ توسەك-ورىن قۇرۋ جوسپارلانۋدا. بۇل جاتاقحانا تاپشىلىعى ماسەلەسىن تولىعىمەن شەشەدى. جاتاقحانا قۇرىلىسى بويىنشا جۇمىستى ءتيىمدى ۇيلەستىرۋ ءۇشىن قالا اكىمدىگى مينيسترلىكپەن بىرلەسىپ ناۋرىز ايىندا جوبالىق كەڭسەنى ىسكە قوستى. بۇگىن ءبىز جاڭا Narxoz جاتاقحاناسىنا ەسكەرتكىش تاس قويدىق. جوبانىڭ ءساتتى جۇزەگە اسۋىنا تىلەكتەسپىن»، - دەدى الماتى قالاسى اكىمىنىڭ ورىنباسارى ارمان قىرىقبايەۆ.
جاڭا ستۋدەنتتەر ءۇيى 3، 5 جانە 7 قاباتتان تۇراتىن، جالپى اۋدانى 8661 شارشى مەتر بولاتىن، 424 ستۋدەنت تۇراتىن عيماراتتار كەشەنى بولادى. ستۋدەنتتەر ەكى نەمەسە ءۇش ادامدىق بولمەلەردە تۇرادى. بولمەلەر جەكە جۋىناتىن بولمە، دۋشپەن جابدىقتالاتىن بولادى. ستۋدەنتتەر ءۇيىنىڭ قۇرىلىس 2024 جىلدىڭ قاراشاسىندا اياقتالادى دەپ جوسپارلانۋدا. جوبانىڭ قۇنى 7 ميلليارد تەڭگەدەن اسادى. قۇرىلىستا ەكولوگيالىق ماتەريالدار قولدانىلىپ، اۋماق كوگالداندىرىلىپ، جاسىل جەلەكتەرمەن كومكەرىلەدى.
- بۇل وزىق الەمدىك تاجىريبەنى ەسكەرە وتىرىپ سالىنعان ۋلترا زاماناۋي حوستەل بولماق. اس ۇيلەر، كوۆوركينگتەر مەن قوسالقى بولمەلەر، ال ءبىرىنشى قاباتتاردا مەديسينالىق پۋنكت، كىر جۋاتىن ورىن، تەحنيكالىق جانە كوممەرسيالىق ءۇي-جايلار، ەرەكشە قاجەتتىلىكتەرى بار ستۋدەنتتەرگە ارنالعان ارنايى جابدىقتالعان بولمەلەر بار.2022 جىلى ءبىلىم بەرۋدىڭ ينفراقۇرىلىمدىق دامۋىندا جاڭا ستاندارتتاردى بەلگىلەگەن نەگىزگى كامپۋسىمىزدى اۋقىمدى قايتا قۇرۋ اياقتالدى. جاڭا جاتاقحانانىڭ سالىنۋى ۋنيۆەرسيتەتتىڭ 60 جىلدىق مەرەيتويىنداعى ودان ءارى دامۋىنداعى ماڭىزدى كەزەڭ، - دەپ اتاپ ءوتتى ۋنيۆەرسيتەت پرەزيدەنتى ميراس داۋلەنوۆ.
بولاشاق عيماراتتىڭ قۇرىلىسى الدىندا Narxoz ۇجىمى كوپ جۇمىس اتقاردى. حالىقپەن كەزدەسۋلەر وتكىزدى. جاتاقحاناداعى قاباتتاردىڭ سانى جارىقتاندىرۋعا زيانىن تيگىزبەيتىن بولادى. سونىمەن قاتار، بولاشاق اللەيانى ىقشاماۋداننىڭ بارلىق تۇرعىندارى پايدالانا الادى. كەسىلگەن اعاشتاردىڭ ورنىنا الماتى بوتانيكالىق باعىنان الىنعان اعاشتار مەن بۇتالار تۇرلەرىنىڭ ۇلگىلەرىنەن جاڭا ساياباق وتىرعىزىلادى.
ايتا كەتەيىك، بيىل Narxoz ۋنيۆەرسيتەتىنە 3500-دەن استام ستۋدەنت وقۋعا ءتۇستى. ناتيجەسىندە ءبىر جىل ىشىندە مەملەكەتتىك گرانت يەگەرلەرىنىڭ ۇلەسى بويىنشا «نارحوز» رەسپۋبليكا بويىنشا 33-ورىننان 5-ورىنعا جىلجىدى. جاڭا جاتاقحانا پايدالانۋعا بەرىلسە، ۋنيۆەرسيتەت ستۋدەنتتەردى باسپانامەن قامتاماسىز ەتۋ ماسەلەسىن تولىعىمەن شەشىپ، بارلىق ستۋدەنتتەردى جايلى باسپانامەن قامتاماسىز ەتە الادى.