قازۇازۋ ستۋدەنتتەرى جەكە مەنشىككە ءوتىپ كەتكەن وقۋ عيماراتتارىن قايتارۋ ماسەلەسىن كوتەردى.
قازاق ۇلتتىق اگرارلىق زەرتتەۋ ۋنيۆەرسيتەتىنىڭ باسقارما ءتوراعاسى – رەكتورى، ق ر ۇعا اكادەميگى كۇرىشبايەۆ اقىلبەك قاجىعۇل ۇلىنىڭ ستۋدەنت جاستارمەن كەزدەسۋىندە العاش رەت جوعارى وقۋ ورنىنداعى سىبايلاس جەمقورلىق ماسەلەسى اشىق الاڭدا تالقىلاندى، دەپ حابارلايدى Almaty-akshamy.kz
«ءبىزدىڭ بۇگىنگى ماقساتىمىز – وقىتۋشىلار مەن ستۋدەنتتەر اراسىندا قانداي دا ءبىر سىبايلاستىق كورىنىستەرىنىڭ بولۋىنا جول بەرمەۋ، جاستاردى جەمقورلىققا توزبەۋگە شاقىرۋ، سىبايلاس جەمقورلىققا قارسى مادەنيەت دەڭگەيىن جوعارىلاتۋ، سول ارقىلى وقۋ پروسەسىنىڭ ساپاسىن كوتەرۋگە ىقپال ەتۋ. وسىعان بايلانىستى، ۋنيۆەرسيتەت باسشىلىعى مەن ستۋدەنتتەر اراسىندا ارىپتەستىك سەنىمدى بايلانىس ورناتۋ ءۇشىن وزدەرىڭىزبەن اشىق ديالوگقا كەلىپ وتىرمىن»، - دەدى ءوز سوزىندە اقىلبەك قاجىعۇل ۇلى.
ءيا، ۇستاز بەن شاكىرت اراسىنداعى سىبايلاستىق پەن جەڭ ۇشىنان جالعاسۋ – بۇلار ءوزارا قابىسپايتىن، مۇلدەم كەرەعار ۇعىمدار ەكەنى بەلگىلى. نەگە دەسەڭىز، ەلگە ەرتەڭ قىزمەت ەتەتىن بولاشاق مامانداردى تاربيەلەپ، دايارلايتىن سانالى وقىتۋشىلاردى جەمقور رەتىندە ەلەستەتۋدىڭ ءوزى قيىن.
وكىنىشكە قاراي، كەزدەسۋ بارىسىندا سويلەگەن ستۋدەنتتەر ۋنيۆەرسيتەت ومىرىندە پارا سۇراۋعا بەيىم جاندار ۇشىراساتىنىن، ساباققا كەلمەسە دە جوعارى بالل الاتىن ءبىلىم الۋشىلاردىڭ از ەمەستىگىن، گرانت بولۋدە كەيبىر وقىتۋشىلاردىڭ قىساستىق جاسايتىنىن جاسىرماي ورتاعا سالدى. سىبايلاس جەمقورلىق فاكتىلەرى مىنانداي جاعدايدا: ستۋدەنتتەر ساباقتان قالعاندا، ارالىق باقىلاۋدى نەمەسە پاندىك جۇمىستاردى قولمەن جازىپ تاپسىرۋ كەزىندە، ەمتيحانداردى قايتا تاپسىرۋ، كۋرستىق جۇمىستار قورعاۋ ساتتەرىندە مۇعالىممەن بەتپە-بەت قالعاندا ءجيى كەزدەسەتىنى اتاپ ءوتىلدى. ستۋدەنتتەر سىبايلاس جەمقورلىقتىڭ ءبىراز ناقتى فاكتىلەرىن اتاپ ءوتتى.
سونىمەن قاتار، ستۋدەنتتەر كەزىندە جەكە مەنشىككە ءوتىپ كەتكەن ۋنيۆەرسيتەتتىڭ وقۋ عيماراتتارىن، ستۋدەنتتىك جاتاقحانانى، ستاديوندى، جەر ۋچاسكەلەرىن مەملەكەتكە قايتارۋ ماسەلەسىن كوتەردى.
وزدەرىمەن وسىنداي اشىق الاڭدى ۇيىمداستىرعان ۋنيۆەرسيتەت باسشىلىعىنا ريزاشىلىقتارىن بىلدىرگەن ستۋدەنتتەردىڭ وي-پىكرلەرى مەن ۇسىنىستارىن تىڭداي كەلە، اقىلبەك كۇرىشبايەۆ ولاردىڭ ساۋالدارىنا جاۋاپتار قايتاردى. سونىمەن بىرگە، وقىتۋشىلار مەن ءبىلىم الۋشىلار اراسىنداعى اشىقتىق پەن ءوزارا سەنىم مەن بايلانىستاردى ودان ارى نىعايتۋ ماقساتىندا پرورەكتورلار مەن ءتيىستى قۇرىلىم باسشىلارىنا ناقتى تاپسىرمالار بەردى.
«وزدەرىڭىز جاقسى بىلەسىزدەر، مەملەكەت باسشىسى قاسىم-جومارت توقايەۆ «ءبىزدىڭ ورتاق ماقساتىمىز – زاڭ مەن ءتارتىپ ۇستەمدىك قۇراتىن، ازاماتتاردىڭ قۇقىعىنا لايىقتى قۇرمەت كورسەتىلەتىن ادىلەتتى قازاقستاندى قۇرۋ» دەگەن ءسوزدى ۇدايى ايتىپ كەلەدى. جەمقورلىقسىز ادىلەتتى ۋنيۆەرسيتەت قۇرۋ – ءبىزدىڭ دە تۇپكى ماقساتىمىز. بۇگىنگىدەي ءوزارا سەنىمگە نەگىزدەلگەن شارالار سىبايلاس جەمقورلىققا قارسى قوزعالىستىڭ نەگىزى بولىپ تابىلادى. الداعى ۋاقىتتا سىبايلاس جەمقورلىققا قارسى ۋنيۆەرسيتەت باعدارلاماسىن قابىلدايتىن بولامىز»، - دەدى ءسوزىنىڭ قورىتىندىسىندا اقىلبەك قاجىعۇل ۇلى.