س. ج. اسفەندياروۆ اتىنداعى قازاق ۇلتتىق مەديسينا ۋنيۆەرسيتەتىنىڭ ستۋدەنتتەرى حالىقارالىق ستۋدەنتتەر كۇنى مەن ۋنيۆەرسيتەتتىڭ ستۋدەنتتىك ۇكىمەت ۇيىمىنىڭ ون بەس جىلدىعىنا وراي، دونورلار كۇنىن وتكىزدى. بولاشاق دارىگەرلەر شىن جۇرەكتەرىنەن شىققان بۇل قايىرىمدىلىق شاراسىن ناۋقاس بالالاردىڭ ءومىرىن قۇتقارۋعا ارنادى.
بولاشاق دارىگەرلەردىڭ دونور بولۋعا دەگەن ىقىلاستارىن الماتى قالالىق قوعامدىق دەنساۋلىق ساقتاۋ باسقارماسىنا قاراستى قالالىق قان ورتالىعىنىڭ ۇجىمى قۋانا قۇپتادى. قان تاپسىرۋعا ۋنيۆەرسيتەتتىڭ سەكسەن ستۋدەنتى ءوتىنىش بىلدىرسە، دونور بولۋدىڭ باستى تالاپتارىنا سايكەس، ونىڭ ەلۋ ەكىسى عانا قان تاپسىرۋعا جولداما الدى. جاس تا بولسا، وسىنداي ساۋاپتى دا قايىرىمدى ىسكە ات سالىسا بىلگەن جاستارعا ورتالىق ديرەكتورى، قالالىق ءماسليحات دەپۋتاتى جاندوس قۋانىشبەك ۇلى ءنادىروۆ ءوز ريزاشىلىعىن ءبىلدىردى.
«قان تاپسىرىپ، ومىرگە ءۇمىت سىيلا!» قايىرىمدىلىق اكسياسىنا قاتىسىپ، وزدەرىنىڭ دونور بولۋعا دەگەن وتىنىشتەرىن ءبىلدىرىپ جاتقان ستۋدەنتتەرگە شىن جۇرەكتەن العىس ايتامىز. سىزدەردىڭ بۇل قايىرىمدىلىق ىستەرىڭىز اۋرۋحانا توسەگىنە تاڭىلىپ، ءبىر تامشى قانعا ءزارۋ بولىپ جاتقان ناۋقاس بالالاردىڭ ءومىرىن قۇتقارۋعا جۇمسالاتىنىن بىلسەڭىزىدەر، جۇرەكتەرىڭىزدى قۋانىش سەزىمى بيلەرى انىق. ادام ءۇشىن ادامنىڭ ءومىرىن قۇتقارۋدان ارتىق ساۋاپتى ءىس بولماس. سىزدەر دونور بولۋعا ىقىلاس تانىتىپ قانا قويماي، ءبىزدىڭ قوعامدا جاقسى ىسكە دانەكەر بولار، قايىرىمدىلىق جاساۋعا جانى جاقىن جاستاردىڭ بارىن ءبىلدىرىپ، قانداي ىستە بىرلەسە، بىرگە بولا الاتىنىمىزدى كورسەتىپ، ءبىزدى قۋانتىپ وتىرسىزدار. تاعى دا سىزدەرگە العىس بىلدىرەمىز جانە دە ءبىزدىڭ ورتالىقتىڭ دونورلار سانىن ارتتىرۋعا ۇلەستەرىڭىزىدى قوسقاندارىڭىز ءۇشىن راحمەت ايتامىز، - دەدى ورتالىق ديرەكتورى ءوز سوزىندە.
قايىرىمدىلىق شاراسىنىڭ ناتيجەسىندە جيىرما التى ليتر قان جينالعان، ول قان تاپشىلىعىن سەزىنىپ جاتقان ناۋقاس بالالار جاتقان اۋرۋحانالارعا جونەلتىلەتىن بولادى.
ەستەرىڭىزگە سالا كەتسەك، جاسى ون سەگىزگە تولعان، دەنساۋلىعىندا كىناراتى جوق كەز كەلگەن ادام دونور بولا الادى. دەيتۇرعانمەن، قان تاپسىرار الدىندا قاتاڭ ساقتالۋعا ءتيىستى تالاپتار بار. سول تالاپتاردى ورىنداي بىلسەڭىز، دونور دەگەن قۇرمەتتى تۇلعانىڭ قاتارىنا قوسىلا الاسىز.
ال بولاشاق دارىگەرلەردىڭ بۇل قايىرىمدى ىستەرى جاستار اراسىندا ءوز جالعاسىن تاباتىنىنا سەنىمدىمىز.