Samsung Electronics كومپانياسىنىڭ Solve for Tomorrow رەسپۋبليكالىق ستارتاپ بايقاۋىنىڭ جاڭا ماۋسىمى باستالدى.
Ayala قايىرىمدىلىق قورىنىڭ قولداۋىمەن جۇزەگە اسىرىلىپ جاتقان جوبا ءتورتىنشى جىل قاتارىنان وتكىزىلۋدە جانە بۇل جولى ۇمىتكەرلەردىڭ رەكوردتىق سانىن جينادى، دەپ حابارلايدى Almaty-akshamy.kz
جارىسقا قاتىسۋعا 2500-دەن استام جوعارى سىنىپ وقۋشىلارى ءوتىنىش ءبىلدىرىپ، 10 ميلليون تەڭگە جۇلدە قورىن ساراپقا سالادى.
Solve for Tomorrow – بۇل عىلىم، تەحنولوگيا، ينجەنەريا جانە ماتەماتيكا (STEM) ارقىلى وزەكتى الەۋمەتتىك ماسەلەلەردى شەشۋگە باعىتتالعان ۇلتتىق دودا بولىپ تابىلادى. بايقاۋ 2009 جىلى اقش-تا قۇرىلىپ، سودان بەرى الەمنىڭ 23 ەلىنە تارادى. قازاقستاندا ول ەندى عانا تانىمال بولىپ كەلەدى.
اعىمداعى جارىستا قازاقستاننىڭ تۇكپىر-تۇكپىرىنەن 700-گە جۋىق مەكتەپ كومانداسى ءوز وتىنىمدەرىن جولدادى. ءبىر اي ىشىندە قازىلار القاسىنىڭ مۇشەلەرى ولاردى مۇقيات زەرتتەپ، جارتىلاي فينالدىق كەزەڭگە كەلەشەگى بار جانە ەڭ قىزىقتى 35 جوبانى تاڭدادى. ەندى جارتىلاي فيناليستەر جاز بويى قارقىندى دايىندىقتان وتەدى. كاسىبي تالىمگەرلەردىڭ كومەگىمەن ستۋدەنتتەر يدەيالارىن ىسكە اسىرۋ كەرەك. ياعني، دايىن ستارتاپتى تانىستىرۋ ماقساتىندا جوبالارىن ازىرلەپ، جەتىلدىرمەك.
ءبىرىنشى تالىمگەرلىك سەسسياسى 22 ماۋسىمدا ءوتتى. وعان الماتى، استانا، تاراز، قوستاناي، قاراعاندى، شىمكەنت، اقتوبە، پاۆلودار جانە باسقا قالالاردان 120-دان استام جوعارى سىنىپ وقۋشىلارى قاتىستى. قاتىسۋشىلار ديزاين ويلاۋ تاجىريبەسىمەن تانىسىپ، بۇل ولاردىڭ جوبالارىنىڭ ءالسىز جاقتارىن انىقتاۋعا جانە ولاردى تۇزەتۋگە كومەكتەستى. بايانداماشى قازاقستانداعى ەڭ ۇزدىك ديزاين ويلاۋ مامانداردىڭ ءبىرى داۆيد تۋگانوۆ بولدى. ول مەكتەپ وقۋشىلارىمەن كوپتەگەن قۇپيالار مەن لايفحاكتارمەن ءبولىستى.
الداعى ۋاقىتتا بەتپە-بەت وقىتۋدان باسقا تاعى بىرنەشە ونلاين تالىمگەرلىك سەسسيالارى مەن پراكتيكالىق سەمينارلار جوسپارلانعان. سول جەرلەردە مەكتەپ وقۋشىلارى بىلىمدەرىن كەڭەيتىپ، ارنايى شاقىرىلعان IT سالاسىنداعى ماماندارمەن تىلدەسۋگە مۇمكىندىك الادى.
تالىمگەرلىك وقىتۋدىڭ ناتيجەسى بويىنشا قاتىسۋشىلار ءوز جوبالارىمەن جۇمىس ىستەپ، پروتوتيپتەرىن جاسايدى. شىلدە ايىنىڭ سوڭىندا سايىسكەرلەر فينالدىق كەزەڭگە ءوتۋ ءۇشىن كۇرەستە قازىلار القاسىنا ءوز جۇمىستارىن ۇسىنۋى كەرەك. بايقاۋدىڭ شەشۋشى كەزەڭى بيىل كۇزدە استانادا وتەدى. ۇزدىك توپتاردىڭ جۇمىسىن ءداستۇرلى تۇردە IT سالاسىنىڭ ساراپشىلارى مەن ءتيىستى ۆەدومستۆولاردىڭ ۆيسە-مينيسترلەرى باعالايدى. «Solve for Tomorrow» جارىسىنىڭ جۇلدە قورى 10 ميلليون تەڭگەدەن اسادى. بايقاۋ تۋرالى تولىق اقپاراتتى solvefortomorrow.kz سايتىنان بىلۋگە بولادى.