2025 جىل قازاقستاندا جۇمىسشى كاسىپتەر جىلى دەپ جاريالانعانى بەلگىلى. ەل پرەزيدەنتى بۇل باستامانىڭ ماڭىزىن ەرەكشە اتاپ ءوتىپ، ەل ەكونوميكاسىنىڭ كەلەشەكتە قاجەت ەتەتىن ماماندارىن دايىنداۋدىڭ ستراتەگيالىق ءرولىن ناقتى كورسەتكەن بولاتىن. سولتۇستىك قازاقستان وبلىسى ءۇشىن بۇل باستاما وزەكتى سيپات الىپ وتىر، سەبەبى وڭىردە الداعى جىلدارى ءىرى تاۋ-كەن مەتاللۋرگيا جوبالارىن ىسكە اسىرۋ جوسپارلانىپ وتىر.
سقو اكىمى گاۋەز نۇرمۇحامبەتوۆتىڭ ايتۋىنشا، ايماقتا بولاشاقتا تاۋ-كەن مەتاللۋرگيالىق كومبينات سالۋ كوزدەلىپ وتىر. ءقازىردىڭ وزىندە «سىرىمبەت» ولوۆو جانە «اقسوران» ۆولفرام كەن ورىندارىن يگەرۋ جۇمىستارى جۇرگىزىلۋدە. بۇل – ءوڭىر ەكونوميكاسىنىڭ جاڭا سەرپىن الۋىنا مۇمكىندىك بەرەدى. سونىمەن قاتار، جاڭا وندىرىستەرمەن بىرگە جۇمىس ورىندارى اشىلىپ، بىلىكتى ماماندارعا دەگەن سۇرانىس ارتادى.
ايماق باسشىسى پەداگوگتاردىڭ تامىز كونفەرەنسياسىندا اتاپ وتكەندەي، ءبىر اي بۇرىن ايىرتاۋ اۋدانىنداعى اگروتەحنيكالىق كوللەدج بەن او "Tin One Mining" كومپانياسى اراسىندا مەموراندۋمعا قول قويىلعان. بۇل قۇجات نەگىزىندە كوللەدجدە تاۋ-كەن ءوندىرىسى ماماندىقتارى بويىنشا وقىتۋ باستالادى. ستۋدەنتتەر تەك تەوريالىق ءبىلىم الىپ قانا قويماي، ناقتى ءوندىرىس ورىندارىندا پراكتيكادان ءوتىپ، بولاشاقتا سۇرانىسقا يە كاسىبي مامان رەتىندە قالىپتاسادى.
ايماق باسشىسى دۋالدى وقىتۋ جۇيەسىنىڭ وڭىردە تيىمدىلىگىن دالەلدەگەنىن اتاپ ءوتتى. مىسال رەتىندە، CLAAS زاۋىتى مەن توو «رادۋگا» كاسىپورىندارىندا وقىپ جۇرگەن ستۋدەنتتەر پراكتيكا بارىسىندا 200 مىڭ تەڭگەگە دەيىن جالاقى الادى جانە وقۋ بىتىرگەن سوڭ جۇمىسقا ورنالاسۋ كەپىلدىگىنە يە.
— ءدال وسى ءتاسىلدى ءبىز گورنو-مەتاللۋرگيا سالاسىنا دا ەنگىزەمىز، — دەدى وبلىس اكىمى.
گ. نۇرمۇحامبەتوۆ قابىلدانىپ جاتقان شارالاردىڭ نەگىزگى ماقساتى – جاستاردى سۇرانىسقا يە ماماندىقتارعا وقىتىپ، ولاردى ەڭبەك نارىعىندا باسەكەگە قابىلەتتى ەتۋ ەكەنىن ايتتى. بۇل ءتاسىل بولاشاقتا سولتۇستىك قازاقستان وبلىسىن ەلىمىزدەگى تاۋ-كەن مەتاللۋرگيا سالاسىنىڭ جاڭا ورتالىعىنا اينالدىرۋعا سەپ بولادى.