الماتى قالاسى قوعامدىق دەنساۋلىق باسقارماسى باسشىسىنىڭ ۋاقىتشا مىندەتىن اتقارۋشى مارات پاشيموۆ مەگاپوليستەگى مەديسينالىق ۇيىمداردى ارالاپ شىقتى.
ينسپەكسيا بارىسىندا ول قالالىق كلينيكالىق اۋرۋحانالارداعى قايتا جاڭعىرتۋ جۇمىستارىمەن جانە ەمحانالاردىڭ قىزمەتىمەن تانىستى. ونىڭ ىشىندە قىلمىستىق-اتقارۋ جۇيەسىنە قاراستى مەكەمەلەرگە قىزمەت كورسەتەتىن ۇيىمدار دا بار.
نەگىزگى نىسانداردىڭ ءبىرى – №4 قالالىق كلينيكالىق اۋرۋحانا. مۇندا ينفراقۇرىلىمدى جاڭعىرتۋ جانە 400 مىڭنان استام تۇرعىنعا كورسەتىلەتىن مەديسينالىق كومەكتىڭ ساپاسىن ارتتىرۋ ماقساتىندا اۋقىمدى رەكونسترۋكسيا ءجۇرىپ جاتىر. بۇگىندە اۋرۋحانا تاۋلىك بويى جۇمىس ىستەيدى: جىلىنا 12،5 مىڭعا دەيىن وتا جاسالادى، ال قابىلداۋ بولىمىنە كۇنىنە 300-گە جۋىق ناۋقاس جۇگىنەدى.
قۇرىلىس كەزىندە مەديسينالىق كومەك ۇزىلمەگەن: پاسيەنتتەرگە ارنالعان بولەك مارشرۋتتار ۇيىمداستىرىلعان، انگيوگراف اپپاراتىنا «جاسىل ءدالىز» جۇمىس ىستەيدى، ينجەنەرلىك جۇيەلەر تۇراقتى باقىلاۋدا تۇر.
ساپار بارىسىندا مارات پاشيموۆ مەردىگەرلەرمەن كەزدەسىپ، قايتا جاڭعىرتۋ بارىسىن تۇراقتى باقىلاۋدا ۇستاپ، مەديسينالىق مەكەمەنىڭ ۇزدىكسىز جۇمىسىن قامتاماسىز ەتۋدى تاپسىردى.
ەرەكشە نازار №24 قالالىق ەمحاناعا اۋدارىلدى. بۇل ەمحانا 2022 جىلدان بەرى الماتىداعى تەرگەۋ يزولياتورىندا جانە تۇزەتۋ مەكەمەلەرىندە وتىرعاندارعا مەديسينالىق كومەك كورسەتىپ كەلەدى. قالادا وسىنداي ءۇش مەكەمە جۇمىس ىستەيدى — №72، №11 جانە №13. ولاردا 2000-نان استام ادام بار.
№72 مەكەمەسىنە بارعان كەزدە مارات پاشيموۆقا زاماناۋي مەديسينالىق ءبولىم كورسەتىلدى. ول ۋدز-نىڭ جوعارى دالدىكتى اپپاراتىمەن، رەنتگەن جابدىعىمەن، ستوماتولوگيالىق قوندىرعىمەن، فليۋوروگرافپەن، فەتالدى مونيتور جانە مەديسينالىق كومەك كورسەتۋگە ارنالعان دەفيبريللياتورمەن جابدىقتالعان.
مۇندا 38 مامان جۇمىس ىستەيدى، ونىڭ ىشىندە 17 دارىگەر بار. مەديسينالىق بولىمدە كلينيكالىق-دياگنوستيكالىق زەرتحانا، كۇندىزگى ستاسيونار، ءدارىحانا قويماسى جانە تەلەمەديسينالىق كەڭەس وتكىزۋ مۇمكىندىگى قاراستىرىلعان.
بۇل پاسيەنتتەرگە كەڭ اۋقىمدى مەديسينالىق قىزمەت كورسەتۋگە جانە ولاردى مەكەمەدەن تىس جەرگە شىعارۋ قاجەتتىلىگىن ازايتۋعا مۇمكىندىك بەرەدى.
بارلىق تۇزەتۋ مەكەمەلەرىندە جالپى پراكتيكا دارىگەرلەرى كۇن سايىن قابىلدايدى، ال تار بەيىندى ماماندار اپتاسىنا ءۇش رەت قابىلداۋ جۇرگىزەدى.
مۇندا تۇراقتى تۇردە پروفيلاكتيكالىق شارالار مەن سكرينينگتەر جۇرگىزىلەدى. ساپار قورىتىندىسى بويىنشا پاشيموۆ قىلمىستىق-اتقارۋ جۇيەسى مەكەمەلەرىندە مەديسينالىق كومەكتى قامتاماسىز ەتۋ جۇمىسىن جالعاستىرىپ، پروفيلاكتيكا باعىتىن جانە تەلەمەديسينانى قولدانۋدى كۇشەيتۋدى تاپسىردى.
ودان كەيىن قوعامدىق دەنساۋلىق باسقارماسىنىڭ باسشىسى №20 قالالىق ەمحاناعا باردى. عيماراتقا جۇرگىزىلگەن كۇردەلى جوندەۋدەن كەيىن ول ارلەۋ جانە ينجەنەرلىك جۇمىستارداعى ءبىرقاتار كەمشىلىكتەرگە، سونداي-اق ىرگەلەس اۋماقتى اباتتاندىرۋعا قاتىستى ماسەلەلەرگە نازار اۋداردى. ۇيىم باسشىلىعىنا انىقتالعان بارلىق كەمشىلىكتى فوتوفيكساسيامەن اكتىگە ەنگىزىپ، بەلگىلەنگەن مەرزىمدە جويۋ تاپسىرىلدى.
جۇمىس ساپارىنا №7 قالالىق كلينيكالىق اۋرۋحانا دا كىردى. مۇندا ستاسيونار كورپۋسىنىڭ قايتا جاڭعىرتۋ جۇمىستارى باستالدى، سونىمەن قاتار ەمحاناعا كۇردەلى جوندەۋ جۇرگىزىلۋدە. بۇل رەتتە مەديسينالىق قىزمەت كولەمى قىسقارتىلعان جوق.
ساپار بارىسىندا مارات پاشيموۆ مەردىگەر ۇيىمدارمەن كەڭەس وتكىزىپ، وندا الداعى رەكونسترۋكسيانىڭ ەسكيزدىك جوبالارى تانىستىرىلدى.
ول جۇمىس كەستەسىن قاتاڭ ساقتاۋدى، ورىندالاتىن جۇمىستاردىڭ ساپاسىن قامتاماسىز ەتۋدى جانە ەڭ باستىسى — تۇرعىندارعا كورسەتىلەتىن مەديسينالىق كومەكتىڭ قولجەتىمدىلىگى مەن ساپاسىن تومەندەتپەۋدى تاپسىردى.
ەسكە سالا كەتەيىك، جوبادا عيماراتتى سەيسميكالىق تۇرعىدان كۇشەيتۋ، كوممۋنيكاسيالاردى جاڭارتۋ، قاۋىپسىزدىك جۇيەلەرىن جەتىلدىرۋ جانە پايدالى اۋماقتى 2500 م²-گە ۇلعايتۋ قاراستىرىلعان.
ءبىرىنشى قابات زاماناۋي فرونت-وفيسكە قايتا جابدىقتالادى. وندا بولەك كىرەبەرىستەر قاراستىرىلىپ، بۇل پاسيەنتتەر ءۇشىن قولايلى جاعداي جاساپ، كەلۋشىلەر مەن پەرسونال اعىنىن بولۋگە مۇمكىندىك بەرەدى.
سونداي-اق №10 قالالىق ەمحاناعا كۇردەلى جوندەۋ جۇرگىزۋگە ارنالعان جوبالىق-سمەتالىق قۇجاتتاما ازىرلەۋ اياقتالىپ كەلەدى. بۇل ەمحانا اۋەزوۆ اۋدانىنداعى 60 مىڭعا جۋىق تۇرعىنعا قىزمەت كورسەتەدى.
بۇل ۇيىمنىڭ وزىندە وتباسى جانە بالالار دەنساۋلىعى ورتالىعى، ايەلدەر كونسۋلتاسياسى، كلينيكو-دياگنوستيكالىق بولىمشە جانە كەڭەيتىلگەن فۋنكسيالارى بار ءموبيلدى بريگادا جۇمىس ىستەپ تۇر. №10 ەمحانا بويىنشا باسقارما باسشىسى جوبالىق-سمەتالىق قۇجاتتامانى جەدەل اياقتاپ، كۇردەلى جوندەۋدى باستاۋدى تاپسىردى.
الماتىداعى مەديسينالىق ۇيىمداردى قايتا جاڭعىرتۋ جانە دامىتۋ – قوعامدىق دەنساۋلىق باسقارماسىنىڭ باستى باعىتتارىنىڭ ءبىرى. بۇل ءىس-شارالار مەديسينالىق كومەكتىڭ قولجەتىمدىلىگى مەن ساپاسىن ارتتىرۋعا، قولدانىستاعى مەكەمەلەرگە تۇسەتىن جۇكتەمەنى ازايتۋعا جانە قالانىڭ دەنساۋلىق ساقتاۋ جۇيەسىن حالىقارالىق ستاندارتتارعا جاقىنداتۋعا باعىتتالعان.