كەنەنىڭ جاپپاي قاپتاۋىنا اۋا رايىنىڭ كۇرت جىلىنۋى سەبەپ بولعان
وڭىردە ناۋرىز ايىنان باستاپ تۇرعىنداردى كەنە شاعا باستاعان، دەپ حابارلايدى Almaty-akshamy.kz «حابار 24» تەلارناسىنا سىلتەمە جاساپ.
كەنە شاققان 260 ادامنىڭ 82ء-سى ون ءتورت جاسقا دەيىنگى بالالار. وتكەن جىلدىڭ وسى كەزەڭىمەن سالىستىرعاندا بۇل 1،8 ەسە كوپ. مۇنداي اقپاراتتى وبلىستىق سانيتارلىق–ەپيدەميولوگيالىق باقىلاۋ دەپارتامەنتىنىڭ ماماندارى حابارلاپ وتىر.
كەنەنىڭ جاپپاي قاپتاۋىنا اۋا رايىنىڭ كۇرت جىلىنۋى سەبەپ بولعان. سوندىقتان، اسىرەسە، تابيعات اياسىنا دەمالۋعا شىعاتىندارعا ەپيدەميولوگ دارىگەرلەر ساق بولۋ كەرەكتىگىن ەسكەرتەدى. سەبەبى بۇل قانسورعىشتار ءتۇرلى جۇقپالى اۋرۋلاردى تاسىمالداۋى مۇمكىن. جالپى وتكەن جىلى وڭىردە كەنە ەنسەفاليتى اۋرۋىنىڭ 9 جاعدايى تىركەلىپ، ءبىر ادام قايتىس بولعان ەدى.
«سوڭعى اپتادا كەنە شاعۋدىڭ 86 جاعدايى تىركەلىپ وتىر. قازىرگى كەزدە كۇن جىلىدى. سوعان بايلانىستى كەنەلەر كوبەيدى. ادامدار كوپتەپ ورمانعا شىعا باستادى. سوندىقتان قازىرگى كەزدە ساقتىق شارالارىن ادامدارعا ۇستانۋعا كەڭەس بەرەمىز»،-دەيدى وبلىستىق سانيتارلىق-ەپيدەميولوگيالىق باقىلاۋ دەپارتامەنتىنىڭ باس مامانى ايناش ساعاندىقوۆا.