سولتۇستىك قازاقستان وبلىسىنىڭ تۇرعىنى بالىق اۋلاپ ءجۇرىپ، كەزدەيسوق تاريحي جاڭالىق اشتى. ول مامونتتىڭ الىپ سۇيەگىن تاۋىپ الدى، دەپ حابارلايدى Aqshamnews.kz.
عىلىم جانە جوعارى ءبىلىم مينيسترلىگىنىڭ مالىمەتىنشە، سۇيەك قىزىلجار اۋدانىنا قاراستى بايتەرەك اۋىلى ماڭىنان تابىلعان. اسەت شايكين ەسىمدى جەرگىلىكتى تۇرعىن بالىق اۋلاپ ءجۇرىپ، ەرەكشە ولجاعا تاپ بولىپ، ونى تاريحشى-ارحەولوگ اناتوليي پلەشاكوۆقا تاپسىرعان.
سۋرەت: عجبم
ەكەۋى بىرگە وقيعا ورنىنا بارىپ، اۋماقتى قاراپ شىققانىمەن، باسقا سۇيەكتەر تابىلماعان. تاريحشىنىڭ ايتۋىنشا، ەجەلگى جانۋاردىڭ قالعان بولىكتەرى توپىراق استىندا جاتۋى مۇمكىن.
"بۇل وتە قىزىقتى ولجا. سۇيەكتىڭ ۇزىندىعى شامامەن 1 مەتر. جاسى - شامامەن 15 مىڭ جىل، ياعني جوعارعى پالەوليت داۋىرىنە جاتادى. ول وتە ءىرى مامونتقا تيەسىلى بولعان. بۇعان دەيىن دە سقو اۋماعىنان ەجەلگى جانۋارلاردىڭ قالدىقتارى تابىلعان. كەلەسى جىلى وسى جەردە قازبا جۇمىستارىن جۇرگىزىپ، سۇيەكتىڭ باسقا بولىكتەرى مەن ەڭبەك قۇرالدارىن تاپساق، بۇل ايماقتاعى العاشقى پالەوليتتىك ەسكەرتكىش بولۋى مۇمكىن"، - دەدى پلەشاكوۆ.
سۋرەت: عجبم
ماماننىڭ سوزىنشە، بولاشاق قازبالار ناقتى وسى اۋماقتا مادەني قاباتتار مەن ارتەفاكتتەردىڭ بار-جوعىن انىقتاۋعا مۇمكىندىك بەرەدى جانە تولىققاندى ارحەولوگيالىق زەرتتەۋ جۇرگىزۋ ماسەلەسىن شەشۋگە نەگىز بولماق.