اتىراۋ وبلىسىندا تابيعي سيپاتتاعى توتەنشە جاعداي جاريالاندى، دەپ حابارلايدى اqshamnews.kz ءتىلشىسى.
بەلگىلى بولعانداي، قۇرمانعازى اۋدانىنىڭ اكىمى بۇل تۋرالى شەشىمدى بيىل 31 شىلدەدە-اق قابىلداعان، الايدا بۇل جايلى اقپارات ەندى عانا بەلگىلى بولىپ وتىر. توتەنشە جاعداي جاريالاۋعا اۋدان اۋماعىنداعى قيعاش جانە شارون وزەندەرى مەن ولاردىڭ ارنالارى، سونداي-اق كاسپيي تەڭىزىنىڭ جاعالاۋىنىڭ تايازدانۋى سالدارىنان گيدرولوگيالىق احۋالدىڭ ناشارلاۋى سەبەپ بولعان.
وبلىس اكىمدىگىنىڭ مالىمەتىنشە، سۋ ايدىندارىنىڭ تارتىلۋى باعالى بالىق تۇرلەرىنىڭ ۋىلدىرىق شاشۋى مەن كوشۋىنە كەدەرگى كەلتىرىپ، تابيعي تەپە-تەڭدىككە كەرى اسەر ەتىپ جاتىر. بۇل جاعداي شەكارالىق جانە قۇقىق قورعاۋ ورگاندارىنىڭ، سونداي-اق بالىق شارۋاشىلىعىمەن اينالىساتىن كەمەلەردىڭ قوزعالىسىن قيىنداتادى. كەيىنگى جىلدارى كاسىبي بالىق اۋلاۋ جاعدايى دا كۇرت ناشارلاعان. ءقازىردىڭ وزىندە بالىق شارۋاشىلىعى سۋبەكتىلەرىنەن كوپتەگەن شاعىمدار تۇسكەن.
سونىمەن قاتار تاعى ءبىرقاتار ماسەلە بار:
-
ارنالار ارقىلى سۋ شىعا الماي، جايىلىم مەن ەگىستىككە جەتپەي جاتىر؛
-
ارنالارداعى سۋدىڭ جوقتىعى اۋىل شارۋاشىلىعى مەن مال شارۋاشىلىعىنا تەرىس اسەر ەتىپ جاتىر.
قۇرمانعازى اۋدانى اكىمدىگى جانىنان توتەنشە جاعدايدىڭ سالدارىن جويۋ بويىنشا جەدەل شتاب قۇرىلدى. ونىڭ باسشىلىعىنا اۋدان اكىمىنىڭ ورىنباسارى تاعايىندالدى. قازىرگى ۋاقىتتا ارنايى ءىس-شارالار جوسپارى بەكىتىلىپ، توتەنشە جاعدايدى جويۋ ءۇشىن قاجەتتى تەحنيكالىق جانە قارجىلىق رەسۋرستاردى ەسەپتەۋ جۇمىستارى جۇرگىزىلىپ جاتىر.
جوسپار بويىنشا قيعاش پەن شارون وزەندەرىنىڭ، سونداي-اق كاسپيي تەڭىزىنىڭ جاعالاۋىنداعى جاركوسىن جانە گانيۋشكين ارنالارىنىڭ ءتۇبىن تەرەڭدەتۋ جۇمىستارى جۇرگىزىلىپ، كەمەلەردىڭ ءجۇرىپ-تۇرۋى مەن باعالى بالىقتاردىڭ ۋىلدىرىق شاشۋىنا جاعداي جاساۋ كوزدەلىپ وتىر.