اقتوبە وبلىسىندا ءۇش كۇن ىشىندە جۇزدەن استام سايعاق قىرىلىپ قالعان، دەپ حابارلايدى Aqshamnews.kz.
وقيعا قايراقتى وزەنى ماڭىندا بولعان. كوكتەمگى كوشى-قون كەزىندە شامامەن 10 مىڭعا جۋىق سايعاق سۋاتقا جاقىنداپ، جاعاسىندا ءبىر-بىرىن تاپتاپ تاستاعان. سالدارىنان جانۋارلار قىرىلۋعا ۇشىراعان.
اقتوبە وبلىستىق ورمان شارۋاشىلىعى جانە جانۋارلار دۇنيەسى اۋماقتىق ينسپەكسياسىنىڭ باسشىسى ادىلكەرەي اۋەلبايەۆتىڭ ايتۋىنشا، قازىرگى ەسەپ بويىنشا 108 ءولى سايعاق تابىلعان، ونىڭ ىشىندە 65ء-ى اتالىق، 43ء-ى انالىق.
"الدىن الا بولجام بويىنشا، جانۋارلار وزەننەن ءوتۋ كەزىندە ءبىرىن-بىرى تاپتاپ كەتكەن. ءقازىر وقيعا ورنىندا ماماندار جۇمىس ىستەپ جاتىر. ولەكسەلەر مەن سۋدان سىنامالار الىنىپ جاتىر"، - دەدى ول.
رەسمي دەرەكتەرگە سۇيەنسەك، اقتوبە وبلىسىندا 300 مىڭنان استام سايعاق بار. قىرىلعان جانۋارلاردىڭ ولەكسەلەرى جينالىپ، كومىلىپ، وقيعا ورنى دەزينفەكسيالانعان.