وتكەن اپتادا قازاقستاندىق سپورتشىلار بىرنەشە جەتىستىككە جەتتى. الدىمەن انگەلينا لۋكاس الەم چەمپيونى اتاعىن جەڭىپ السا، كۇنى كەشە قاتار استاناسى دوحادا ءوتىپ جاتقان سۋ سپورت تۇرلەرىنەن الەم چەمپيوناتىندا ەدۋارد كيم مەن نارگيزا بولاتوۆا ارتىستىك جۇزۋدەن التىن مەدال جەڭىپ الدى
سونىمەن وتكەن اپتادا قازاقستاندىق سپورتشىلارىمىزدىڭ جەتىستىگىن تىزبەكتەسەك.
كونكيمەن جۇگىرۋ: جاپونيانىڭ حاتينوحە قالاسىندا مارەسىنە جەتكەن كونكيمەن جۇگىرۋدەن جاستار اراسىنداعى الەم كۋبوگىنىڭ كەزەڭىندە قازاقستان سپورتشىلارى ۇزدىكتەر قاتارىنان كورىندى. 1000 مەترگە جارىستا نەو-سەنور ساناتىندا ۇلتتىق قۇرامانىڭ 2 سپورتشىسى جۇلدەگە قول جەتكىزدى. مارگاريتا ارتەميەۆا 2ء-شى ناتيجە كورسەتىپ، كۇمىس جۇلدەگەر اتانسا، ماريا كۋزنەسوۆا قولاعا يە بولدى. قىزدار اراسىنداعى كوماندالىق نەو-سەنورلار جارىسىندا ۇلتتىق قۇراما سپورتشىلارى توپ جارسا، ءجاسوسپىرىم قىزدار ساناتىنداعى ۇلتتىق قۇراما كۇمىس جۇلدەگە يە بولدى. ال ءجاسوسپىرىم ۇلدار جانە نەو-سەنور باسەكەسىندە جەرلەستەرىمىز قولا جۇلدەگەر اتاندى. سونىمەن قاتار كانادانىڭ كۆەبەك قالاسىنداعى ەرەسەكتەر اراسىنداعى الەم كۋبوگىنىڭ كەزەكتى كەزەڭىندە جەرلەستەرىمىز العاش رەت كوماندالىق سپرينتتە قولا جۇلدەگە قول جەتكىزدى. اتالعان باسەكەدە ەل نامىسىن ەكاتەرينا ايدوۆا، ينەسسا شۋمەكوۆا جانە الينا داۋرانوۆا قورعاعان بولاتىن.
تەننيس: قازاقستاننىڭ ءبىرىنشى، الەمنىڭ 27-راكەتكاسى الەكساندر بۋبليك مونپەلەدە (فرانسيا) وتكەن ATP 250 ءتۋرنيرىنىڭ جەڭىمپازى اتاندى. ول فينالدا الەمدىك رەيتينگتە 37-ورىندا تۇرعان حورۆاتيالىق بورنا چوريچپەن شەبەرلىك بايقاسىپ، ءۇش سەتكە جالعاسقان ماچتا 5:7، 6:3، 6:3 ەسەبىمەن قارسىلاسىنان باسىم ءتۇستى.
بوكس: يسپانيانىڭ لا نۋسيا قالاسىندا ۇيىمداستىرىلعان بوكستان Boxam Elite-2024 تۋرنيرىندە قازاقستان ايەلدەر قۇراماسى ەكى التىن مەدال جەڭىپ الدى. باس جۇلدە ءۇشىن وتكەن باسەكەدە جازيرا وراقبايەۆا (52 كگ) مەن ءلاززات كۇنگەيبايەۆا (+81 كگ) توپ جارىپ، جارىس جەڭىمپازى اتاندى. ال ايگەرىم ساتىبايەۆا (48 كگ)، نازىم قىزايباي (50 كگ)، انەل ساقىش (54 كگ)، ايدا ابىكەيەۆا (63 كگ)، ءمادينا نۇرشايەۆا (70 كگ)، گۇلسايا ەرجان (75 كگ) جانە فاريزا شولتاي (81 كگ) كۇمىس جۇلدەگە قول جەتكىزدى.
سەمسەرلەسۋ: شۆەيساريانىڭ بازەل قالاسىندا وتكەن سەمسەرلەسۋدەن الەم كۋبوگىندە قازاقستان قۇراماسىنىڭ سپورتشىلارى شپاگا باسەكەسىندە كۇمىس جۇلدەگەر اتاندى.
نىسانا كوزدەۋ: نيكيتا چيريۋكين كايردەگى الەم كۋبوگىندە كۇمىس جۇلدە جەڭىپ الدى. ول 25 مەتردەن تاپانشامەن جىلدام نىسانا كوزدەۋدە تەك وڭتۇستىك كورەيا سپورتشىسى سون جۋن حوعا ەسە جىبەردى. نيكيتانىڭ ەنشىسىندە – 31، ال جەڭىمپازدا – 37 ۇپاي. قولا جۇلدە العان فلوريان پەتەر (گەرمانيا) 27 رەت ءدوپ تيگىزدى.