ق ر الەۋمەتتىك كودەكسىنىڭ كۇشىنە ەنۋىمەن 2023 جىلعى 1 شىلدەدە ەلىمىزدە مەملەكەتتىك الەۋمەتتىك قورعاۋ ينسپەكتورلارىنىڭ ينستيتۋتى ەنگىزىلدى، ونىڭ قۇزىرەتىنە مۇگەدەكتىگى بار ادامداردى الەۋمەتتىك قورعاۋ، ارناۋلى الەۋمەتتىك قىزمەتتەر كورسەتۋ جانە الەۋمەتتىك قامسىزداندىرۋ سالاسىنداعى زاڭنامانىڭ ساقتالۋىن باقىلاۋدى جۇزەگە اسىرۋ كىرەدى.
2024 جىلدىڭ باسىنان بەرى الەۋمەتتىك ينسپەكتورلار 204 تەكسەرۋ جۇرگىزدى، ونىڭ 29-ى پروفيلاكتيكالىق باقىلاۋ شەڭبەرىندە، 175ء-ى جوسپاردان تىس تەكسەرۋلەر بولدى، دەپ حابارلايدى Almaty-akshamy.kz ەڭبەك جانە حالىقتى الەۋمەتتىك قورعاۋ مينيسترلىگىنە سىلتەمە جاساپ.
مەملەكەتتىك باقىلاۋمەن قامتىلدى: اكىمدىكتەر – 16، جەرگىلىكتى اتقارۋشى ورگاندار باسقارمالارى – 2، جۇمىسپەن قامتۋ جانە الەۋمەتتىك باعدارلامالار بولىمدەرى – 2، مەكتەپتەر – 167، دۇكەندەر – 4، ارناۋلى الەۋمەتتىك قىزمەتتەر كورسەتۋ ورتالىقتارى – 2، مادەنيەت ءۇيى – 1، بانك فيليالى – 1، نوتاريۋس – 1، مۇراعات – 1، بالاباقشا – 1، كوللەدج – 1، كافەلەر، مەيرامحانالار – 2، جك – 3.
ماسەلەن، ەڭبەك جانە الەۋمەتتىك قورعاۋ كوميتەتىنىڭ قوستاناي وبلىسى بويىنشا دەپارتامەنتى قوعامدىق بىرلەستىك وكىلدەرىنىڭ ءوتىنىشى نەگىزىندە مۇگەدەكتىگى بار ادامدار ءۇشىن قولجەتىمدىلىكتىڭ بولماۋ فاكتىسى بويىنشا ساۋدا وبەكتىسىنە جوسپاردان تىس تەكسەرۋ جۇرگىزدى. تەكسەرۋ ناتيجەلەرى بويىنشا ءىرى كاسىپكەرلىك سۋبەكتىسى ايىپپۇل تۇرىندە اكىمشىلىك جاۋاپكەرشىلىككە تارتىلدى، انىقتالعان بۇزۋشىلىقتاردى جويۋ تۋرالى نۇسقاما ەنگىزىلدى.
سونىمەن قاتار، وڭىرلەردەگى الەۋمەتتىك ينسپەكتورلار مۇگەدەكتىگى بار ادامداردىڭ زاڭدى قۇقىقتارىن قامتاماسىز ەتۋ ءۇشىن الەۋمەتتىك ينفراقۇرىلىم وبەكتىلەرىنىڭ بەيىمدەلۋ ءىس-شارالارىن جۇرگىزۋدە وڭ ديناميكانى اتاپ ءوتتى.
ءبىرىنشى توپ مۇگەدەكتىگى بار ەرقۇلان شامشەتوۆتىڭ ايتۋىنشا، اقتوبە قالاسىندا مۇگەدەكتىگى بار ادامدار ءۇشىن الەۋمەتتىك ينفراقۇرىلىم نىساندارىنا قولجەتىمدىلىك ايتارلىقتاي جاقساردى.
«جۇبايىم ەكەۋمىز 12 شاعىن اۋدانداعى № 3 ەمحاناعا بارامىز. ەمحانا سوڭعى ۇلگىدە سالىنعان، دالىزدەر كەڭ، پەرنوسالى وتە مەيىرىمدى، عيمارات ىشىندە اربادا جۇرۋگە وتە ىڭعايلى، ليفت تە قاراستىرىلعان. جۇبايىمدا دا ءبىرىنشى توپ مۇگەدەكتىگى بار، ەمحانادا ءبىز اربامەن كەدەرگىسىز جۇرەمىز، جايلى جاعداي جاساعانى ءۇشىن وتە ريزامىز»، – دەدى ەرقۇلان شامشەتوۆ.
سونىمەن قاتار، ق ر ەڭبەكمينى ەڭبەك جانە الەۋمەتتىك قورعاۋ كوميتەتىنىڭ اۋماقتىق دەپارتامەنتتەرى 2023 جىلى 1 783 تەكسەرۋ جۇرگىزىپ، انىقتالعان بۇزۋشىلىقتاردى جويۋ تۋرالى 1 171 ۇيعارىم بەردى، 98،4 ملن تەڭگەدەن استام سوماعا 467 ايىپپۇل سالدى.