سپورتشى قىزداردىڭ سۋرەتىمەن پوشتا ماركاسى شىقتى

بىرەۋى – شاحمات تاريحىنداعى بليستان ەڭ جاس الەم چەمپيونى ءبيبىسارا اساۋبايەۆا، ەكىنشىسى – تەننيسشى ەلەنا رىباكينا.

«قازپوشتا» «قازاقستان چەمپيوندارى» تاقىرىبىندا «سپورت» سەرياسىمەن پوشتا ماركاسىن شىعارعان، دەپ حابارلايدى Almaty-akshamy.kz.

پوشتا ماركالارىندا شاحماتشى ءبيبىسارا اساۋبايەۆا مەن تەننيسشى ەلەنا رىباكينا بەينەلەنگەن.

«پوشتا ماركالارى «قازپوشتا» اق شاحمات جانە تەننيس فەدەراسيالارىمەن بىرىگىپ شىعارىلىپ، اينالىمعا ەنگىزىلدى. ماركالار سپورتشىلارعا ەرەن ەڭبەگى ءۇشىن ارنايى شىعارىلدى. «قازپوشتا» وسىلايشا چەمپيوندارعا كوركەمدىك ماركالار شىعارىپ، قۇرمەت كورسەتتى. بۇل بۇكىل قازاقستان حالقىنىڭ داڭقتى سپورتشىلارىمىزعا، ارۋ قىزدارعا كورسەتكەن قۇرمەتى دەپ بىلەمىن. بۇگىن فيلاتەليستەر ءوز كوللەكسيالارىن چەمپيونداردىڭ اتاۋلى ماركالارىمەن تولىقتىرۋدا»، – دەدى «قازپوشتا» اق باسقارما ءتوراعاسى اسەل جاناسوۆا.

ءبيبىسارا اساۋبايەۆا – شاحمات تاريحىنداعى بليستان ەڭ جاس الەم چەمپيونى. راپيدتەن الەم چەمپيوناتىنىڭ كۇمىس جۇلدەگەرى، ازيا چەمپيونى، قازاقستان رەسپۋبليكاسىنىڭ ەڭبەك سىڭىرگەن سپورت شەبەرى.

ەلەنا رىباكينا – تەننيسشى، ۋيمبلدون-2022 جەكەلەي سىنىندا ۇلكەن دۋلىعا جەڭىمپازى، WTA جەكەلەي سىنىندا بەس ءتۋرنيردىڭ جەڭىمپازى؛ 18 جاسقا دەيىنگى جاسوسپىرىمدەر كوماندالىق بىرىنشىلىگىندە ەۋروپا چەمپيونى.

ماركا وفسەتتىك مورمەن باسىپ شىعارىلعان، 4 بوياۋمەن بويالعان، پەرفوراسيا – رامالىق. شىعارىلىم فورماسى – ەكى ماركالى پوشتا بلوگى. بلوكتىڭ مولشەرى – 120ح48 مم. ماركا مولشەرى – 52ح29،6 مم. نومينالى – 600 تەڭگەدەن. تارالىمى – 10 000 بلوك. ديزاينىن ءى.وڭعارباي جاساعان.