بيىلعى كۇزگى اسكەرگە شاقىرتۋ ناۋقانىنىڭ اياسىندا الماتىدان وتان الدىنداعى بورىشىن وتەۋگە 17 سپورتشى اتتاندى. ولاردىڭ اراسىندا حالىقارالىق دارەجەدەگى سپورت شەبەرلەرى دە بار. سپورتتاعى جەتىستىكتەرىنە قاراماستان، ولار بىردەن اسكەري بورىشىن وتەۋ تۋرالى شەشىم قابىلداپ، وزدەرىنىڭ ازاماتتىق پارىزدارىن ورىنداۋعا دايىن ەكەندىكتەرىن كورسەتتى.
مۇنداي جاس ساربازداردىڭ قاتارىندا ۆيكتور درۋزين مەن دىنمۇحامەد وماروۆ بار. ۆيكتور – سينحروندى جۇزۋدەن حالىقارالىق دارەجەدەگى سپورت شەبەرى، ال دىنمۇحامەد – گرەك-ريم كۇرەسىنەن سپورت شەبەرى. بۇل جاستار سپورتتا بيىك شىڭداردى باعىندىرىپ قانا قويماي، ءوز ۇلگىسىمەن شىنايى پاتريوتيزم مەن ازاماتتىق بورىشقا ادالدىقتىڭ جارقىن مىسالىن كورسەتىپ وتىر.
ۆيكتور درۋزين – قازاقستان چەمپيوناتىنىڭ جەڭىمپازى جانە كانادانىڭ الەم كۋبوگى كەزەڭىنىڭ يەگەرى. سونىمەن قاتار ول جۇڭگو، پاريج جانە بۋداپەشتتەگى الەم كۋبوگى كەزەڭدەرىندە جۇلدەلى ورىندارعا يە بولعان. سپورتتىق جەتىستىكتەرىمەن ەل ماقتانىشىنا اينالعان ۆيكتور اسكەري قىزمەتتى ەر ازامات ءۇشىن ماڭىزدى ومىرلىك كەزەڭ دەپ سانايدى.
دىنمۇحامەد وماروۆ – گرەك-ريم كۇرەسىنەن قازاقستان چەمپيونى جانە حالىقارالىق تۋرنيرلەردىڭ جەڭىمپازى. بيىل يسپانيادا وتكەن حالىقارالىق تۋرنيردە توپ جارىپ، ءوزىنىڭ جوعارى دەڭگەيدەگى دايىندىعىن دالەلدەدى. دىنمۇحامەد اسكەري قىزمەتتى ءوز وتباسىنىڭ ءداستۇرى رەتىندە ەرەكشە قۇرمەتتەيدى. ونىڭ تۋعان ءىنىسى تەمىرتاۋدا اسكەري بورىشىن وتەپ جاتىر، ال اكەسى دە كەزىندە وتان قورعاۋ ساپىندا بولعان.
– ەر ازامات اسكەري ءبىلىم مەن داعدىعا يە بولۋى كەرەك. بۇل ءار قازاق جىگىتىنىڭ قالىپتى ءارى ماڭىزدى كەزەڭى، – دەيدى دىنمۇحامەد.
الماتى ءاردايىم جاس سپورتشىلاردىڭ پاتريوتتىق سەزىمىن كورسەتەتىن جارقىن ۇلگى بولىپ كەلەدى. 2016 جىلى ريو-دە-جانەيرو وليمپياداسىنىڭ ەكى دۇركىن چەمپيوندارى – اۋىر اتلەت نيدجات راحيموۆ پەن ءجۇزۋشى دميتريي بالاندين اسكەر قاتارىنا شاقىرىلعان بولاتىن. ال 2023 جىلى بوكستان الەم چەمپيونى سانجار تاشكەنباي دا اسكەري بورىشىن وتەپ، بولاشاق ساربازدارعا ۇلگى بولدى.
بۇل مىسالدار جاڭا بۋىن ساربازدارىن شابىتتاندىرىپ، ولاردىڭ پاتريوتتىق سەزىمىن نىعايتا تۇسەدى.
ەسكە سالايىق، كۇزگى اسكەرگە شاقىرۋ ناۋقانى جەلتوقسان ايىنىڭ سوڭىنا دەيىن جالعاسادى. بۇل ناۋقان بارىسىندا الماتىدان 18-27 جاس ارالىعىنداعى، دەنساۋلىعى جارامدى، كەيىنگە شەگەرۋ قۇقىعى جوق مىڭنان استام جاس جىگىت اسكەري بورىشىن وتەۋگە اتتانادى.