ەلىمىزدە بالالار-جاسوسپىرىمدەر سپورت مەكتەپتەرىنىڭ مامانداندىرىلعان بولىمشەلەرىنىڭ، وليمپيادالىق رەزەرۆتىڭ مامانداندىرىلعان مەكتەپ-ينتەرنات-كوللەدجدەرىنىڭ، دارىندى بالالارعا ارنالعان سپورت مەكتەپ-ينتەرناتتاردىڭ پەداگوگتەرىنە، جاتتىقتىرۋشى-وقىتۋشىلارىنا بىلىكتىلىك ساناتى ءۇشىن قوسىمشا اقى تولەنە باستادى، دەپ حابارلايدى Almaty-akshamy.kz.
مادەنيەت جانە سپورت مينيسترلىگىنىڭ مالىمەتىنشە، پەداگوگ-مودەراتور بىلىكتىلىك ساناتى ءۇشىن لاۋازىمدىق ەڭبەكاقىنىڭ 30% مولشەرىندە، پەداگوگ-ساراپشىعا — لاۋازىمدىق ەڭبەكاقىنىڭ 35%، پەداگوگ-زەرتتەۋشىگە – 40% جانە پەداگوگ-شەبەر بىلىكتىلىك ساناتى ءۇشىن — لاۋازىمدىق ەڭبەكاقىنىڭ 50% مولشەرىندە ۇستەمەاقى تولەنەدى.
ەلىمىزدە دەنە شىنىقتىرۋ جانە سپورت سالاسىندا 66 مىڭنان استام مامان جۇمىس ىستەيدى. ولاردىڭ اراسىندا وقىتۋشىلار، جاتتىقتىرۋشىلار، ادىسكەرلەر جانە باسقا دا قىزمەتكەرلەر بار. ونىڭ ىشىندە مامانداردىڭ شامامەن 42%-ى نەمەسە 28 مىڭنان استامى اۋىلدىق جەرلەردە قىزمەت اتقارادى.
«ەلىمىزدە بۇقارالىق سپورت پەن دەنە شىنىقتىرۋدى دامىتۋ - مامان دايارلاۋمەن جانە سالا قىزمەتكەرلەرىنىڭ بىلىكتىلىگىن ارتتىرۋمەن تىكەلەي بايلانىستى. جىل سايىن 2 مىڭعا جۋىق مەكتەپ تۇلەگى جوعارى وقۋ ورىندارىنا «دەنە شىنىقتىرۋ جانە سپورت» ماماندىعى بويىنشا قابىلدانادى. بۇگىنگى تاڭدا ۋنيۆەرسيتەتتەردىڭ ءبىلىم بەرۋ باعدارلامالارى جاڭارتىلىپ، ولارعا «سپورت مەنەدجمەنتى»، «سپورت پسيحولوگياسى»، «دەنساۋلىق مەنەدجمەنتى»، «سپورتتىق قۇقىق»، «سپورتتىق مەديسينا»، «سپورت جۋرناليستيكاسى» جانە باسقا دا جاڭا پاندەر قوسىلدى»، دەدى مادەنيەت جانە سپورت ۆيسە-مينيسترى سارسەن قۇرانبەك.