كولونيادا 63 بالا جازاسىن وتەپ جاتىر
الماتى قالاسىنداعى بالالار كولونياسىندا جازاسىن وتەپ جۇرگەن جاسوسپىرىمدەردىڭ اسىعا كۇتەتىن مەرەكەلەرىنىڭ ءبىرى – بالالار كۇنى، دەپ حابارلايدى Almaty-akshamy.kz.
اتالعان كولونيادا مەملەكەتتىك مەرەكەلەردىڭ بارلىعى دا اتالىپ وتكەنمەن، بالالار ءۇشىن 1 ماۋسىمداعى مەرەكەنىڭ ورنى ەرەكشە. ويتكەنى بۇل كۇنى ولار ساعىنىپ جۇرگەن اتا-انالارىمەن، تۋىستارىمەن جۇزدەسەدى. جىلداعى ءداستۇر بويىنشا بيىل دا مەكەمە قىزمەتكەرلەرى بالالار مەرەكەسىندە «اشىق ەسىك» كۇنىن وتكىزدى.
رەسپۋبليكاداعى قىلمىس جاساعان بالالار جازاسىن وتەيتىن جالعىز كولونيادا قازىرگى تاڭدا 63 بالا ۇستالۋدا. ونىڭ ىشىندە 49 بالا اسا اۋىر قىلمىس جاساعانى ءۇشىن، 14 بالا اۋىر قىلمىس جاساعانى ءۇشىن سوتتالعان.
ويناقتاپ ءجۇرىپ وت باسقان جاسوسپىرىمدەردىڭ بۇگىنگى جاناشىرى دا، اتا-اناسىنىڭ ورنىنداعى قامقورشىلارى دا – مەكەمە قىزمەتكەرلەرى. جازالى جاسوسپىرىمدەرگە ارنالعان مەرەكەنى اشقان الماتى قالاسى بويىنشا قىلمىستىق-اتقارۋ جۇيەسى دەپارتامەنتىنىڭ باس مامانى ماديار سەرىك ۇلى كونكانوۆ اتالعان مەرەكەنىڭ تاريحى مەن ماڭىزىنا توقتالىپ، بالالاردى ءتول مەرەكەلەرىمەن قۇتتىقتادى.
«2022 جىلدى مەملەكەت باسشىسى ق-ج.توقايەۆ بالالار جىلى دەپ جاريالاپ، ولاردىڭ ساپالى ءبىلىم الىپ، ەگەمەندى ەلىمىزگە قاجەتتى ماماندىق يەسى بولىپ شىعۋلارىنا باسا نازار اۋدارۋدا. سوندىقتان سەندەردىڭ ەركىن ومىرگە تەزىرەك ارالاسىپ، وزدەرىڭنىڭ اڭساعان ماقساتتارىڭا جەتۋلەرىڭە تىلەكتەسپىز»-دەدى م.كونكانوۆ.
«اشىق ەسىك» كۇنى جاسوسپىرىمدەر وزدەرىنە ارنالعان مەرەكەلىك كونسەرتتى اتا-انالارىمەن، باۋىرلارىمەن بىرگە تاماشالادى.
سونىمەن قاتار جازالى بالالار مەن ولاردىڭ اتا-انالارى مەرەكە كۇنى سپورتتىق جارىستارعا دا بىرگە قاتىسىپ، جۇلدەلى ورىندار ءۇشىن ب ا ق سىناستى. سپورتتىق جارىستاردا بەلسەندىلىك تانىتقان كوماندالارعا ارنايى سىيلىقتار تاپسىرىلدى.
بالالار مەرەكەسىنىڭ سوڭىندا سوتتالعان بالالار اتا-انالارىمەن بىرگە مەرەكەلىك داستارقاندا باس قوستى.