ءماجىلىس دەپۋتاتتارى سوت رەفورماسىن جۇزەگە اسىرۋ ماسەلەلەرىن تالقىلادى
ءماجىلىستىڭ زاڭناما جانە سوت-قۇقىقتىق رەفورما كوميتەتى سوت جۇيەسىن رەفورمالاۋدىڭ وزەكتى ماسەلەلەرىن تالقىلاۋعا ارنالعان دوڭگەلەك ۇستەل وتكىزدى. كوشپەلى وتىرىس جوعارعى سوت جانە سوت اكىمشىلىگىمەن بىرلەسىپ ۇيىمداستىرىلدى، دەپ حابارلايدى aqshamnews.kz
وتىرىستى اشقان كوميتەت ءتورايىمى سنەجاننا يماشيەۆا بۇگىندە زاڭ مەن ءتارتىپتىڭ ۇستەمدىگى مەملەكەت باسشىسىنىڭ رەفورمالار باعدارىنىڭ باستى قاعيداسى ەكەنىن اتاپ ءوتتى. ول ەل ازاماتتارى تاراپىنان تولىق قولداۋ تاپقان. دەپۋتات جۇرگىزىلىپ جاتقان سوت رەفورماسىنىڭ ازاماتتار ءۇشىن ماڭىزدىلىعى مەن زاڭعا تولىق سايكەس بەيتاراپ، ءادىل سوت تورەلىگىن قامتاماسىز ەتۋ تۋرالى ەگجەي-تەگجەيلى ايتىپ بەردى.
جوعارعى سوت ءتوراعاسى اسلامبەك مەرعالييەۆ ءوز سوزىندە ەلوردادا ءۇش كاسساسيالىق سوت قۇرۋ جوباسى جەدەل جۇزەگە اسىرىلعانىن، اكىمشىلىك ىستەر بويىنشا ەكساۋماقتىق سوتتىلىقتىڭ ىسكە قوسىلعانىن قاماۋعا الۋعا بالاما رەتىندە تاتۋلاستىرۋ راسىمدەرى مەن ەلەكتروندى باقىلاۋ قۇرالدارىن قولدانۋدىڭ ارتقانىن ايتتى.
تالقىلاۋ بارىسىندا سوت ءىسىن جۇرگىزۋدىڭ وزەكتى ماسەلەلەرى قوزعالىپ، سوت جۇيەسىن ودان ءارى جەتىلدىرۋ بويىنشا ۇسىنىستار ايتىلدى.
سونىمەن قاتار دوڭگەلەك ۇستەل اياسىندا جوعارعى سوتتىڭ احۋالدىق ورتالىعىنىڭ جۇمىسى جانە يننوۆاسيالىق سيفرلىق شەشىمدەر تانىستىرىلدى.