قازاقستان رەسپۋبليكاسى كونستيتۋسيالىق سوتى ءتوراعاسىنىڭ ورىنباسارى باقىت نۇرمۇحانوۆ كونستيتۋسيالىق كوميسسيانىڭ كەزەكتى وتىرىسىندا جاڭا كونستيتۋسيا جوباسىنداعى سوت تورەلىگى جۇيەسىنە، جەرگىلىكتى باسقارۋعا جانە نەگىزگى زاڭعا وزگەرىستەر ەنگىزۋ تارتىبىنە قاتىستى ماڭىزدى وزگەرىستەر تۋرالى باياندادى، - دەپ حابارلايدى Aqshamnews.kz.
ونىڭ ايتۋىنشا، كونستيتۋسيانىڭ سەگىزىنشى ءبولىمى – «سوت تورەلىگى. پروكۋراتۋرا. قۇقىق قورعاۋ تەتىكتەرى» اياسىندا سوت تورەلىگىنىڭ كونستيتۋسيالىق قاعيداتتارى ايتارلىقتاي كۇشەيتىلگەن. سوت ءىسىن جۇرگىزۋ نىساندارىنىڭ قاتارى ارتتى، سۋديالاردىڭ تاۋەلسىزدىگى نىعايدى. سوت جۇيەسىنىڭ كادر ماسەلەلەرى شەشىلدى. سونداي-اق ادۆوكاتۋرانىڭ قۇقىقتىق مارتەبەسى العاش رەت كونستيتۋسيادا ناقتى بەكىتىلدى.
«بۇل – ادام قۇقىقتارى مەن بوستاندىقتارىن قورعاۋ كەپىلدىكتەرىن ارتتىرۋعا، سونداي-اق قوعامنىڭ سوت جۇيەسىنە دەگەن سەنىمىن كۇشەيتۋگە باعىتتالعان ماڭىزدى قادام»، – دەپ اتاپ ءوتتى باقىت نۇرمۇحانوۆ.
سونىمەن قاتار ول كونستيتۋسيانىڭ جەرگىلىكتى مەملەكەتتىك باسقارۋ مەن ءوزىن-وزى باسقارۋ ماسەلەلەرىنە ارنالعان توعىزىنشى ءبولىمى قۇرىلتايدىڭ قۇرىلۋى جانە ەلىمىزدە جۇرگىزىلىپ جاتقان اكىمشىلىك رەفورمانى ەسكەرە وتىرىپ قايتا قارالعانىن ايتتى. ءبىرقاتار نورمالار ناقتىلانىپ، مەملەكەتتىك باسقارۋدىڭ جاڭا جاعدايلارىنا بەيىمدەلگەن.
«بۇل ءبولىمنىڭ جاڭارتىلۋى مەملەكەت پەن قوعامنىڭ جەرگىلىكتى دەڭگەيدەگى ءوزارا ءىس-قيمىلىن ءتيىمدى ەتۋگە دەگەن ۇمتىلىستى كورسەتەدى»، – دەپ ناقتىلادى كونستيتۋسيالىق سوت ءتوراعاسىنىڭ ورىنباسارى.
بۇدان بولەك، باقىت نۇرمۇحانوۆ كونستيتۋسيادا جاڭا، ونىنشى ءبولىمنىڭ پايدا بولعانىنا نازار اۋداردى. بۇل ءبولىم نەگىزگى زاڭعا وزگەرىستەر مەن تولىقتىرۋلار ەنگىزۋ تارتىبىنە ارنالادى. سونداي-اق ول «قورىتىندى جانە وتپەلى ەرەجەلەر» دەپ اتالاتىن ون ءبىرىنشى ءبولىمنىڭ مازمۇنىنا توقتالدى. اتاپ ايتقاندا، بۇدان بىلاي كونستيتۋسياعا وزگەرىستەر پرەزيدەنتتىڭ شەشىمىمەن جانە تەك جالپىحالىقتىق رەفەرەندۋم ارقىلى عانا ەنگىزىلەدى. سونىمەن بىرگە رەفەرەندۋم وتكىزۋ باستاماسىن كوتەرەتىن سۋبەكتىلەر قاتارىنا حالىق كەڭەسىن قوسۋدى كوزدەيتىن نورما قاراستىرىلعان.