Air Astana الماتى – شانحاي – الماتى باعىتىندا جاڭا تۇراقتى رەيس اشادى، - دەپ حابارلايدى Aqshamnews.kz.
بيلەتتەر ساتىلىمعا شىعارىلدى، ال العاشقى رەيستەردى ىسكە قوسۋ 2026 جىلعى 29 ناۋرىزعا جوسپارلانعان (مەملەكەتتىك ورگانداردان قاجەتتى رۇقساتتار الىنعان جاعدايدا).
الماتىدان ۇشۋلار سەيسەنبى، بەيسەنبى جانە جەكسەنبى كۇندەرى ورىندالادى. ۇشىپ كەتۋ ۋاقىتى – 19:10، شانحايعا كەلۋ – 04:25 (كەلەسى كۇن). قايتار رەيستەر دۇيسەنبى، سارسەنبى جانە جۇما كۇندەرى جۇزەگە اسىرىلادى: شانحايدان ۇشۋ – 05:40، الماتىعا كەلۋ – 10:15.
رەيستەر زاماناۋي ءارى جايلى Airbus A321LR اۋە كەمەسىمەن ورىندالادى. ۇشۋ ۇزاقتىعى الماتىدان شانحايعا 6 ساعات 15 مينۋت، كەرى باعىتتا 7 ساعات 35 مينۋتتى قۇرايدى.
بارلىق الىمداردى قوسا ەسەپتەگەندە، ەكونوم-كلاستاعى بارىپ-قايتۋ بيلەتتەرىنىڭ ەڭ تومەنگى قۇنى 281 312 تەڭگەدەن، ال بيزنەس-كلاسستا 921 132 تەڭگەدەن باستالادى. بيلەتتەردى Air Astana-نىڭ رەسمي سايتىنان، ءموبيلدى قوسىمشاسىنان جانە اككرەديتتەلگەن تۋريستىك اگەنتتىكتەردەن ساتىپ الۋعا بولادى.
جاڭا باعىتتىڭ اشىلۋى Air Astana-نىڭ قىتايداعى مارشرۋتتىق جەلىسىن كەڭەيتەدى. بۇعان دەيىن اۋە كومپانياسى بەيجىڭ، گۋانچجوۋ، ءۇرىمشى جانە سانيا قالالارىنا رەيستەر ورىنداپ كەلگەن. الماتى – شانحاي باعىتى قازاقستان مەن ازيانىڭ ءىرى ىسكەرلىك ورتالىقتارىنىڭ ءبىرى اراسىنداعى تۋريستىك جانە ىسكەرلىك ساپارلارعا قوسىمشا مۇمكىندىك بەرەدى.
شانحاي – قىتايدىڭ قارجى جانە ىسكەرلىك استاناسى سانالاتىن مەگاپوليس. قالا زاماناۋي ساۋلەتىمەن، باي تاريحىمەن جانە مادەني ارتۇرلىلىگىمەن تانىمال. نەگىزگى كورىكتى ورىندارىنىڭ قاتارىندا ۆايتان جاعالاۋى، «شىعىس مارجانى» تەلەمۇناراسى، يۋيۋان باعى، سونداي-اق مۋزەيلەر، تەاترلار مەن ءىرى ساۋدا كۆارتالدارى بار. سونىمەن قاتار قازاقستاندىقتار ءۇشىن قىتايعا ۆيزاسىز كىرۋ مۇمكىندىگى قاراستىرىلعان.