1-ماۋسىم حالىقارالىق بالالاردى قورعاۋ كۇنى
ماۋسىم حالىقارالىق بالالاردى قورعاۋ كۇنىنە وراي، الماتى قالاسى قالالىق قان ورتالىعىنا كەلىپ قان تاپسىرعان قازاقستان رەسپۋبليكاسى الماتى قالاسى بويىنشا سوت اكىمشىلىگى دەپارتامەنتىنىڭ سوت قىزمەتكەرلەرى مەن مەملەكەتتىك قىزمەتشىلەرىنىڭ وڭىرلەرىنە ورتالىق باسشىلىعى «مەن قان دونورىمىن» توسبەلگىسىن تاقتى.
الماتى قالالىق قان ورتالىعىنىڭ «قان تاپسىرىپ، ومىرگە ءۇمىت سىيلا!» دەگەن ۇندەۋىن كوزى شالعان دەپارتامەنت باسشىلىعى ءوز قىزمەتكەرلەرىنە قان تاپسىرۋ جونىندە ۇسىنىس بىلدىرگەن بولاتىن، بۇل باستاماعا بىردەن ەلۋدەن استام قىزمەتكەر قولداۋ ءبىلدىرىپ، قان تاپسىرۋعا كەلىسىمدەرىن بەرىپتى.
– ءومىر بولعان سوڭ ءتۇرلى جاعدايلار بولادى عوي، ءبىر ادام اۋىر جول اپاتىنا تۇسسە، پەرزەنتحانادا ومىرگە ادام اكەلەمىن دەپ كوپ قان جوعالتقان قانشاما انا قانعا مۇقتاج بولىپ جاتىر، دەنساۋلىعى مەن ءومىرى قانعا تاۋەلدى قانشاما بالالار مەن ناۋقاس جاندار بار، سول سەبەپتى قان تاپسىرىپ، ادامعا ءومىر سىيلاۋ ءار ادامنىڭ ازاماتتىق بورىشى دەپ ويلايمىن. قان تاپسىرعانداردىڭ قاتارىندا دەپارتامەنتتىڭ سوت قىزمەتكەرلەرى، مەملەكەتتىك قىزمەتشىلەرى جانە سۋديالارىمەن بىرگە اۋداندىق سوتتىڭ باسشىلارى مەن قىزمەتكەرلەرى دە بار. بۇگىن قان بەرۋگە كەلگەن ارىپتەستەرىمنىڭ بۇل قادامدارىن ۇلكەن ادامگەرشىلىك پەن قايىرىمدىلىق ءىس دەپ باعالايمىن، – دەيدى قىزمەتكەرلەرىن وسى ساۋاپتى ىسكە باستاپ كەلگەن الماتى قالاسى بويىنشا سوت اكىمشىلىگى دەپارتامەنتى باسشىسىنىڭ ورىنباسارى اباي عالىمجان ۇلى جارىلقاسىن.
قان ورتالىعىنىڭ دارىگەرلەرى مەن زەرتحانا قىزمەتكەرلەرىنىڭ قاتاڭ تەكسەرۋلەرىنەن وتكەن دەپارتامەنتتىڭ 50 قىزمەتكەرى قان دايىنداۋ ءبولىمىنىڭ قان جانە ونىڭ كومپونەنتتەرىن دايىنداۋ بلوگىندا قان تاپسىرىپ، ادامعا ءومىر ءسۇرۋ ءۇمىتىن سىيلاۋ پارىزدارىن وتەدى. دەپارتمەنت باسشىلىعىنىڭ باستاماسىن قۋانا قولداعان قالالىق قان ورتالىعىنىڭ ديرەكتورى، الماتى قالالىق ءماسليحاتىنىڭ دەپۋتاتى جاندوس ءنادىروۆ سوت قىزمەتكەرلەرىنە العىس ءبىلدىرىپ، ولاردى ورتالىقتىڭ ەڭ قۇرمەتتى ماراپاتى «مەن قان دونورىمىن» دەگەن توسبەلگىسىمەن ماراپاتتادى. جاندوس قۋانىشبەك ۇلى، قان دونورى بولۋعا نيەت بىلدىرۋشىلەردىڭ قاتارى جىل ساناپ ءوسىپ كەلە جاتقانىن جەتكىزىپ، دەپارتمەنتتىڭ بۇل باستاماسىنا وزگەلەردىڭ دە قولدايتىنىنا سەنىم ءبىلدىردى. ويتكەنى، جاقسى باستاما قاشاندا ءوز جالعاسىن تابادى.
دەپارتمەنت قىزمەتكەرلەرى تەك ايتۋلى كۇندەردە عانا ەمەس، قايىرىمدىلىق شارالارىن وزدەرىنىڭ الەۋمەتتىك باعىتتارىنا اينالدىرىپ، مەيىرىمدىلىك پەن قايىرىمدىلىق قاجەت جەردەن تابىلىپ جۇرەدى. ولار قالامىزداعى جەتىم سابيلەرگە ارنالعان سابيلەر ءۇيىن قامقورلىقتارىنا العان. قالا ومىرىندە وتەتىن سپورتتىق جانە پەن مادەني ءىس شارالاردا دا دەپارتمەنتتىڭ قىز -جىگىتتەرى الدىڭعى قاتاردان كورىنىپ كەلەدى. ال دەپارتامەنت قىزمەتكەرەلەرى بەرگەن جيىرما ءۇش ليتر قان قانشاما ادامنىڭ ءومىرىن قۇتقارۋعا سەپتىگىن تيگىزەدى دەسەڭىزشى!!!
مۇندايدا جارايسىڭدار، جاقسى ىستەرىڭ جالعاستى بولسىن دەيسىڭ.
نۇرجامال بايساقالوۆا.