سەمەيدە كوپقاباتتى ءۇي پودەزىندە بولعان وقيعا تۇسىرىلگەن ۆيدەو بىرنەشە كۇننەن بەرى الەۋمەتتىك جەلىدە قىزۋ تالقىلانىپ جاتىر، دەپ حابارلايدى Aqshamnews.kz ءتىلشىسى.
بەينەجازبا اۆتورى ارۋجان ەسىمدى بويجەتكەننىڭ ايتۋىنشا، ول تاڭعى 04:00 شاماسىندا جۇمىستان ۇيىنە ورالعان. پودەزدىڭ كىرەبەرىس ەسىگىن اشا بەرگەن ساتتە ارتىنان بەلگىسىز قىز ەرىپ كىرگەن. پودەزگە كىرەر كەزدە بەلگىسىز قىز ۇرىس شىعارىپ، ارۋجاننىڭ ءبىرىنشى كىرگەنىن تالاپ ەتكەن.
"تۇندە مۇنداي جاعداي بولادى دەپ ويلامادىم. قىز بالاسى بولعان سوڭ قورىقپايمىن دەپ تە ويلادىم. الايدا ونىڭ ارەكەتى مەن اگرەسسياسى شوشىتتى. مەنىڭ ۆيدەوعا ءتۇسىرىپ تۇرعانىمدى كورگەندە ول باسقاشا سويلەي باستادى. بايقاپ جۇرىڭىزدەر"، - دەيدى ۆيدەوداعى قىز.
اباي وبلىسىنىڭ پوليسيا دەپارتامەنتى بۇل فاكتىگە قاتىستى تەرگەۋدى باستاعان.
"انىقتالعانداي، 2026 جىلعى 25 قاڭتار كۇنى ساعات 03:21 شاماسىندا سەمەي قالاسىنداعى قاراعايلى ىقشام اۋدانىندا ورنالاسقان ۇيلەردىڭ ءبىرىنىڭ پودەزى ماڭىندا ەكى ازاماتشا اراسىندا اۋىزشا جانجال شىققان. جانجال بارىسىندا 24 جاستاعى بويجەتكەن بەيادەپ سوزدەر ايتىپ، قوعامدىق ءتارتىپتى بۇزعان. وقيعاعا قاتىسقان بارلىق تۇلعالار انىقتالىپ، تۇسىنىكتەمە الىندى. اتالعان دەرەك بويىنشا 24 جاستاعى ازاماتشاعا قاتىستى ۇساق بۇزاقىلىق جاساعانى ءۇشىن اكىمشىلىك ءىس قوزعالدى"، - دەلىنگەن حابارلامادا.
الەۋمەتتىك جەلىدەگى پىكىرلەردە قاراعايلى اۋدانىنىڭ تۇرعىندارى بۇل قىزدىڭ تۇنگى ۋاقىتتا پودەزدەردە ءجۇرىپ، قاباتتاردى ارالايتىنىن ايتىپ، بۇعان دەيىن تۇسىرىلگەن باسقا ۆيدەولاردى دا جاريالاعان. كەي جازبالاردا قىزدىڭ اناسى ونىڭ ءبىلىمدى ەكەنىن، شەتەلدە وقىعانىن ايتىپ، «ەشقانداي اۋىتقۋ بايقاماعانىن» جەتكىزگەنى دە ايتىلادى. وقىرماندار اراسىندا جاعدايعا الاڭداۋشىلىق ءبىلدىرىپ، ءتيىستى ورگاندار تاراپىنان قوسىمشا تەكسەرۋ قاجەت ەكەنىن جازعاندار بار.