قازاقستان-پورتۋگاليا ماچىندا ۇلتتىق قۇراما فينالعا ءسال-اق جەتپەي قالدى
ليتۆانىڭ كاۋناس قالاسىندا وتكەن فۋتزالدان الەم چەمپيوناتىنىڭ جارتىلاي فينالىندا قازاقستان قۇراماسى جوعارى دارەجەدەگى ويىن كورسەتتى. اتالعان ماچ اياقدوپشىلار مەن جانكۇيەرلەردىڭ ءتۇرلى ەموسيانى باستان كەشىرگەن تارتىستى ساتتەرىنە تولى بولدى، دەپ حابارلايدى Almaty-akshamy.kz.
تارتىستى وتكەن كەزدەسۋ ويىن باسىنان-اق شيەلەنىسكەن ساتتەرگە تولى بولدى. ويىننىڭ نەبارى ءۇشىنشى مينۋتىندا وتاندىق فۋتبولشىمىز ءبىرجان ورازوۆ ەسەپ اشقان. الايدا تورەشىلەر ونىڭ بۇل گولىن VAR-دى قاراۋ ناتيجەسىندە ەسەپكە المادى.
الما-كەزەك شابۋىلدارعا يەك ارتقان كوماندالار ءبىرىنشى تايمدى تەڭ ەسەپپەن اياقتادى. ويىنداعى ءبىرىنشى گولدى 23-مينۋتتا پورتۋگاليالىق پاني سوقتى. ەسەپتى تەڭەستىرۋگە ۇمتىلعان ءبىزدىڭ ويىنشىلار قارسىلاستار قاقپاسىن ءجيى مازالادى. جىگەرى جاسىماعان ويىنشىلارىمىز اقىرىندا ويىن اياقتالۋعا ساناۋلى سەكۋندتار قالعاندا ەسەپتى تەڭەستىرىپ، كەزدەسۋ تاعدىرىن قوسىمشا تايمداردا شەشۋ مۇمكىندىگىن الدى. گول اۆتورى - نۇرعوجين.
ەكسترا-تايم باستالعانىنا كوپ وتپەي، ءبىزدىڭ ويىنشىمىز دۋگلاس ايىپ دوبىن بىردەن قاقپاعا باعىتتاپ، ەسەپتى العا شىعاردى. جەڭىلىپ جاتقان پورتۋگاليا قۇراماسى دا بارىن سالا وتىرىپ، كەزدەسۋ اياعىندا برۋنۋ كوەليۋدىڭ كومەگىمەن ەسەپتى تەڭەستىرە الدى. ويىن تاعدىرى پەنالتي سەرياسىندا شەشىلدى. پەنالتيدە دۋگلاس ي ارنولد كناۋب ءمۇلت كەتىپ، قازاقستان جەڭىلىس تاپتى. ويىن ەسەبى 4:3-پەن اياقتالدى
ەندى جەكسەنبى كۇنى ەل قۇراماسى الەم چەمپيوناتىنىڭ قولا جۇلدەسى ءۇشىن برازيليامەن كەزدەسەدى.