ەلوردادا قازاق تىلىندە كونتەنت جاساۋشىلاردىڭ ءداستۇرلى بەسىنشى فورۋمى ءجۇرىپ جاتىر، دەپ حابارلايدى almaty-akshamy.kz
شارانىڭ اشىلۋىنا ق ر اقپارات جانە قوعامدىق دامۋ ءمينيستىر ايدا بالايەۆا قاتىسىپ، ۇيىمداستىرۋشى تاراپ – اقش-تىڭ قازاقستانداعى ەلشىلىگىنە العىس ءبىلدىردى.
«بيىل تاۋەلسىزدىكتىڭ ءۇشىنشى ونجىلدىعىن باعىندىرعان مەملەكەتىمىزدىڭ اقش-پەن ديپلوماتيالىق بايلانىس ورناتقانىنا دا 30 جىل بولىپ وتىر. وسى ۋاقىت ارالىعىندا اقش ەلشىلىگى ەكى ەل اراسىنداعى بايلانىستى نىعايتۋعا ارنالعان ءتۇرلى جوبالارعا تۇراقتى قولداۋ كورسەتىپ كەلەدى. سولاردىڭ ءبىرى – داستۇرگە اينالعان ءقازاقتىلدى ونلاين كونتەنت جاساۋشىلار فورۋمى. وسىمەن بەسىنشى رەت وتكىزىلىپ وتىرعان بۇل شارا، ءسوز جوق، قازاق ينتەرنەتىندەگى وزەكتى ماسەلەلەردى تالقىلاپ، ورتاق شەشىم تابۋعا سەپتىگىن تيگىزەتىن اۋقىمدى پلاتفورما»، - دەگەن ۆەدومستۆو باسشىسى بۇگىنگى تاڭدا مەملەكەتتىك باق-تاعى ءقازاقتىلدى كونتەنتتىڭ ۇلەسى 78 پروسەنتكە جەتكەنىن اتادى.
«ونىڭ ىشىندە تەلەارناداعى كونتەنت – 79،2 پروسەنت، باسپا باسىلىمدارى –84،5 پروسەنت جانە ينتەرنەت رەسۋرستاردا – 59،81 پروسەنت. وسىدان 10 جىل بۇرىن مەملەكەتتىك تىلدە اقپارات تاراتاتىن التى سايت قانا بولسا، بۇگىنگى جاعداي مۇلدەم بولەك. قازىرگى تاڭدا وتاندىق ينتەرنەت مەديانىڭ شامامەن 14 پروسەنت ۇلەسىن ءقازاقتىلدى سايتتار قۇراپ وتىر. جىلدان-جىلعا ءقازاقتىلدى ينتەرنەت پورتالداردىڭ سانى دا، وقىرماندار قاتارى دا ارتىپ كەلەدى. سوڭعى ەكى جىل ىشىندە جاڭادان 46 سايت اشىلدى. وتاندىق مەديا قازاق تىلىندە كونتەنت جاساۋ اقپاراتتىق ساياساتتاعى باسىم باعىتتاردىڭ ءبىرى. ول سالاداعى اتقارىلعان جۇمىستاردىڭ كولەمى دە، ساپاسى دا جىلدان-جىلعا ارتىپ كەلە جاتىر»، - دەدى ايدا بالايەۆا.