الماتىنىڭ 35 جوعارى وقۋ ورنىندا 236،1 مىڭ ستۋدەنت وقيدى. ستۋدەنتتەردىڭ ەلەۋلى بولىگى ەلىمىزدىڭ باسقا وڭىرلەرىنەن كەلگەندەر جانە شەتەلدىك ازاماتتار. بۇل تۋرالى الماتى قالاسى جاستار ساياساتى باسقارماسىنىڭ وكىلدەرى ايتتى.
قالا وڭىردەگى ەڭ ءىرى ءبىلىم بەرۋ ورتالىقتارىنىڭ ءبىرى. كوپۇلتتى ستۋدەنتتىك ورتا الماتىلىق جوعارى وقۋ ورىندارىنا دەگەن تۇراقتى قىزىعۋشىلىقتى ارتتىرىپ، قالانىڭ ءبىلىم بەرۋ ەكوجۇيەسىنىڭ حالىقارالىق سيپاتىن كۇشەيتىپ وتىر.
ايتا كەتەيىك، 2023 جىلى قازاقستاندا 82 ەلدەن كەلگەن 26 مىڭ شەتەلدىك ستۋدەنت ءبىلىم العان. بۇل ەلدەگى ستۋدەنتتەردىڭ جالپى سانىنىڭ 4،4% - ى (606 مىڭ ادام). شەتەلدىك ستۋدەنتتەردىڭ ەلەۋلى بولىگى ەلىمىزدىڭ ەڭ ءىرى ستۋدەنتتىك ورتالىعى سانالاتىن الماتىعا تيەسىلى.
شەتەلدىك ستۋدەنتتەردىڭ باسىم كوپشىلىگى ءال-فارابي اتىنداعى قازاق ۇلتتىق ۋنيۆەرسيتەتىندە وقيدى - 4،5 مىڭ ادام. ەكىنشى ورىندا س. اسفەندياروۆ اتىنداعى قازاق ۇلتتىق مەديسينا ۋنيۆەرسيتەتى. مۇندا 1،9 مىڭ شەتەلدىك ستۋدەنت ءبىلىم الىپ ءجۇر، ونىڭ ىشىندە 1،2 مىڭ ادام (63،2%) ءۇندى ەتنوسىنىڭ وكىلدەرى.
ۇزدىك ۇشتىك قاتارىندا ق. ساتبايەۆ اتىنداعى قازاق ۇلتتىق تەحنيكالىق زەرتتەۋ ۋنيۆەرسيتەتى بار. اتالعان وقۋ ورنىندا تۇركىمەنستاننان كەلگەن 1،9 مىڭ شەتەلدىك ستۋدەنت ءبىلىم الىپ ءجۇر. اباي اتىنداعى قازاق ۇلتتىق پەداگوگيكالىق ۋنيۆەرسيتەتىندە 1،8 مىڭ شەتەلدىك ستۋدەنت وقيدى.
«سوڭعى ءبىر جىلدىڭ ىشىندە شەتەلدىك ستۋدەنتتەر سانى 45%-دان استامعا ءوستى (17،1 مىڭنان 22،6 مىڭعا دەيىن، ياعني 5،5 مىڭعا ارتتى). ءبىزدىڭ جوعارى وقۋ ورىندارىنىڭ الەمدىك رەيتينگتەردەگى ورنىن نىعايتىپ، حالىقارالىق باعدارلامالاردى دامىتىپ، جوعارى ساپالى زاماناۋي ءبىلىم بەرۋ ورتاسىن قالىپتاستىرىپ جاتقانى ءبىز ءۇشىن ۇلكەن ماقتانىش. بۇل الەمنىڭ تۇكپىر-تۇكپىرىنەن كەلەتىن ستۋدەنتتەردىڭ قىزىعۋشىلىعىن وياتادى»، — دەدى الماتى قالاسى جاستار ساياساتى باسقارماسىنىڭ باسشىسى ازيز كاجدەنبەك.