قوس ەل اراسىندا ۆيزاسىز رەجيم ەنگىزىلگەن سوڭ قازاقستان ازاماتتارى قىتايعا ءجيى بارا باستاعان. بۇل تۋرالى سىرتقى ىستەر مينيسترلىگىنىڭ رەسمي وكىلى ايبەك سمادياروۆ ايتتى، دەپ حابارلايدى اlmaty-akshamy.kz.
«بىلتىر 10 قاراشادا كۇشىنە ەنگەن ەكى ەل اراسىنداعى كەلىسىم ءوز ناتيجەسىن بەرىپ جاتىر. ستاتيستيكاعا سۇيەنسەك، 2023 جىلعى 10 قاراشادان بەرى قازاقستانعا 126 مىڭ جۇڭگو ازاماتى كەلگەن. سونداي-اق وسى ۋاقىتتان بەرى قىتايعا 173 مىڭ قازاقستاندىق بارعان. ءوزىم دە 2 كۇن بۇرىن قىتايعا بارىپ كەلدىم. ۇشاقتىڭ بارىندە تولعان قازاقستان ازاماتتارى. سۇراستىرساڭ، كوبى تۋريست. مىسالى، 1-2 اتا-انانى كوردىم. ولار بالالارىن (قىتايدا) وقىتۋ ءۇشىن ۋنيۆەرسيتەت قاراۋعا بارا جاتىر ەكەن. سوندىقتان مادەني گۋمانيتارلىق بايلانىس نىعايىپ كەلەدى. پرەزيدەنتتىڭ جانە سىرتقى ىستەر ءمينيسترىنىڭ ساپارى دا وتە ءساتتى ءوتتى دەپ ويلايمىن»، - دەدى رەسمي وكىل.
ەسكە سالايىق، 2023 جىلدىڭ قاراشاسىندا قازاقستان مەن جۇڭگو اراسىندا ۆيزاسىز رەجيم كۇشىنە ەندى. ەكى تاراپتىڭ كەلىسىمىنە سايكەس، جۇڭگو جانە قازاقستان ازاماتتارى كورشى ەلدە شەكارادان وتكەن كۇننەن باستاپ 30 كۇنگە دەيىن ۆيزاسىز بولا الادى. جالپى 180 كۇن ىشىندە ۆيزاسىز 90 كۇننەن ارتىق جۇرە المايدى.
«2023 جىلعى 10 قاراشادا قازاقستان ۇكىمەتى مەن جۇڭگو ۇكىمەتى اراسىنداعى ۆيزالىق تالاپتاردان ءوزارا بوساتۋ تۋرالى كەلىسىم كۇشىنە ەندى. وسى كەلىسىمنىڭ 1ء-شى بابىنا سايكەس، ەكى ەلدىڭ ازاماتتارى جەكە ىستەردى، ءتۋريزمدى، ەم قابىلداۋدى، حالىقارالىق تاسىمالداردى، ترانزيتتىك، سونىمەن بىرگە ىسكەرلىك ماقساتتاردى جۇزەگە اسىرۋ ءۇشىن ۆيزالىق تالاپتاردان بوساتىلادى. وسى رەتتە ازاماتتاردىڭ ەكى مەملەكەت اۋماعىندا بولۋ مەرزىمى كۇنتىزبەلىك 30 (وتىز) كۇننەن اسپايتىن مەرزىمدەگى كەزەڭگە، ال كۇنتىزبەلىك 180 (ءجۇز سەكسەن) كۇن ىشىندە جيىنتىعىندا كۇنتىزبەلىك 90 (توقسان) كۇننەن اسپاۋى قاجەت»، دەپ جازىلعان قازاقستان ءسىم-نىڭ حابارلاماسىندا.