اسىرەسە، كارتوپ پەن كۇنباعىس مايى باعاسى شارىقتاعان.
نەگىزگى قاجەتتى تاۋارلاردىڭ باعاسى سوڭعى 2،5 جىلدان استام ۋاقىت ىشىندە رەكوردتىق دەڭگەيدە ءوستى، دەپ حابارلايدى aqshamnews.kz
ءبىرىنشى نەسيە بيۋروسىنىڭ مالىمەتىنشە، 8-14 قاڭتار ارالىعىندا الەۋمەتتىك ماڭىزى بار ازىق-تۇلىك ونىمدەرىنىڭ باعاسى 0،5%-عا ءوستى. الدىڭعى رەت وسىنداي جوعارى اپتا سايىنعى ءوسۋ 2022 جىلدىڭ ءساۋىر ايىندا بايقالعان بولاتىن، سول كەزدە ءامات باعاسى ناۋرىز ايىنداعى انومالدى ءوسۋ كەزەڭىنەن كەيىن قالىپتى دەڭگەيگە ورالىپ ەدى.
ءامات-تىڭ قىمباتتاۋى 13 اپتا بويى جالعاسىپ كەلەدى. بۇل، شىنىمەن دە ۇزاق ۋاقىتقا سوزىلىپ وتىر: سوڭعى ەكى جىلدىڭ ماڭىزدى كەزەڭدەرىندە مۇنداي سوزىلمالى ءوسۋ بايقالماعان ەدى.
جالپى العاندا، 19 نەگىزگى ازىق-تۇلىك ءونىمىنىڭ 10-ى تۇتىنۋشىلار ءۇشىن قىمباتتادى. ەڭ قيىن جاعداي كارتوپ پەن كۇنباعىس مايىندا: ولاردىڭ باعاسى شەكتەن تىس وسكەن.
"كارتوپتىڭ باعاسى 4،7%-عا كوتەرىلدى. بۇل ءوسىم قاڭتار ايىنىڭ وزىندە ەكستريمالدى بولىپ كورىنەدى، ءبىر اپتانىڭ ىشىندە وسىنداي جوعارى كورسەتكىش وتە سيرەك كەزدەسەدى. مىسالى، 2015-2024 جىلدار ارالىعىندا قاڭتار ايىندا كارتوپتىڭ ورتاشا باعاسى 2،9%-عا قىمباتتاعان. بۇل ءوسۋ ماۋسىمدىق فاكتورلارعا بايلانىستى ەمەس ەكەنىن ءتۇسىنۋ قاجەت. كارتوپتىڭ باعاسى ءداستۇرلى تۇردە مامىر جانە ماۋسىم ايلارىندا قاتتى كوتەرىلەدى، سەبەبى كوكونىس ساقتاۋ قويمالارىنىڭ جەتكىلىكسىزدىگى جانە قاجەتتى كليماتتىق جابدىقتاردىڭ جوقتىعى وسى كەزەڭدە كارتوپتىڭ بۇزىلۋىنا اكەپ سوعادى، بۇل ءوز كەزەگىندە باعانىڭ كۇرت اۋىتقۋىنا سەبەپ بولادى"، دەپ جازىلعان بيۋرو مالىمەتىندە.
كۇنباعىس مايىنىڭ باعاسى 1،8%-عا قىمباتتادى (2022 جىلدىڭ باسىنان بەرى ەڭ جوعارى كورسەتكىش). بۇل — كوپتەگەن تاعامداردىڭ نەگىزگى ينگرەديەنتى سوڭعى 26 اپتا بويى ۇزدىكسىز قىمباتتاپ جاتىر، ال بۇعان دەيىن، 2023 جىلدىڭ اقپانىنان 2024 جىلدىڭ شىلدەسىنە دەيىن تۇراقتى تۇردە ارزانداپ كەلگەن ەدى. ەسكە سالساق، 2023 جىلدىڭ اقپانىندا كۇنباعىس تۇقىمدارىنا ەكسپورتتىق باج سالىعى ەنگىزىلگەن بولاتىن. بۇل شارانىڭ ماقساتى — جەرگىلىكتى كۇنباعىس مايىن وندىرۋشىلەرگە جەتكىلىكتى شيكىزات قامتاماسىز ەتۋ ارقىلى وندىرىستەرىن تولىعىمەن جۇكتەپ، باعالاردى تومەندەتۋ ەدى.
قىزىقتىسى، فەرمەرلەردىڭ نارازىلىعىنا قاراماستان، ءقازىر باج سالىعى ءالى كۇنگە دەيىن كۇشىندە قالىپ وتىر جانە سول بۇرىنعى دەڭگەيىندە. وسىلايشا، كۇنباعىس تۇقىمدارىنىڭ ەكسپورتى ازايىپ، كۇنباعىس مايىنىڭ ەكسپورتى كەرىسىنشە ارتتى. مىسالى، 2024 جىلدىڭ 11 ايىندا كۇنباعىس تۇقىمدارى ەكسپورتى وتكەن جىلمەن سالىستىرعاندا 34%-عا ازايسا، كۇنباعىس مايىنىڭ ەكسپورتى 22%-عا ءوستى.