ق ر وقۋ-اعارتۋ مينيسترلىگىندە كامەلەتكە تولماعانداردىڭ ىستەرى جانە ولاردىڭ قۇقىقتارىن قورعاۋ جونىندەگى ۆەدومستۆوارالىق كوميسسيانىڭ 2025 جىلعى العاشقى وتىرىسى ءوتتى.
ونىڭ جۇمىسىنا ورتالىق مەملەكەتتىك جانە جەرگىلىكتى اتقارۋشى ورگانداردىڭ، ۇكىمەتتىك ەمەس ۇيىمداردىڭ وكىلدەرى قاتىستى.
جيىندا كامەلەتكە تولماعاندار اراسىنداعى قۇقىق بۇزۋشىلىقتاردىڭ، قاداعالاۋسىز جانە پاناسىز قالۋدىڭ الدىن الۋ، سونداي-اق بالالاردىڭ قاۋىپسىزدىگى مەن ءال-اۋقاتىن قامتاماسىز ەتۋگە باعىتتالعان جۇيەلى شارالار تالقىلاندى، دەپ حابارلايدى aqshamnews.kz وقۋ-اعارتۋ مينيسترلىگىنە سىلتەمە جاساپ.
رەسمي ستاتيستيكاعا سايكەس، سوڭعى 10 جىلدا ەلدەگى جاسوسپىرىمدەر قىلمىسىنىڭ دەڭگەيى ءۇش ەسەگە تومەندەگەن. قۇقىقبۇزۋشىلىقتاردى انىقتاۋ جانە تىركەۋ كورسەتكىشىنىڭ وسۋىنە قاراماستان، 2024 جىلدىڭ قورىتىندىسى بويىنشا قوسىمشا 5%-عا ازايعانى بايقالادى. دەگەنمەن، جەتىسۋ، ۇلىتاۋ، پاۆلودار، اقمولا، قاراعاندى وبلىستارى، سونداي-اق استانا جانە شىمكەنت قالالارىندا ءالى دە ناقتى جانە ماقساتتى شەشىمدەردى تالاپ ەتەتىن ماسەلەلەر بار.
ىشكى ىستەر مينيسترلىگىنىڭ وكىلى اتاپ وتكەندەي، ەلىمىزدە كامەلەتكە تولماعاندار اراسىنداعى قۇقىقبۇزۋشىلىقتاردىڭ الدىن الۋ بويىنشا كەشەندى جۇمىس جۇرگىزىلۋدە. الايدا، الەۋمەتتىك ورتانىڭ قارقىندى وزگەرۋى بۇل ۇدەرىستە مەملەكەتتىك ورگانداردان باستاپ اتا-انالارعا دەيىنگى بارلىق تاراپتاردىڭ بەلسەندى قاتىسۋىن قاجەت ەتەدى. بۇل ءتاسىل ق ر وقۋ-اعارتۋ مينيسترلىگىنە قاراستى بالالاردىڭ قۇقىقتارىن قورعاۋ كوميتەتىنىڭ تالدامالىق ماتەريالدارىندا دا كورىنىس تاپقان.
كوميسسيا اعىمداعى جاعدايدى، جاسوسپىرىمدەر اراسىنداعى قۇقىققا قارسى مىنەز-قۇلىقتىڭ نەگىزگى سەبەپتەرىن ەگجەي-تەگجەيلى زەردەلەپ، ولاردى الەۋمەتتەندىرۋ جانە الدىن الۋ بويىنشا پراكتيكالىق قادامدار ۇسىندى.
وتىرىستى قورىتىندىلاي كەلە، ق ر وقۋ-اعارتۋ ءمينيسترى عاني بەيسەمبايەۆ جەرگىلىكتى اتقارۋشى ورگاندارعا الدىن الۋ شارالارىن كۇشەيتىپ، جۇمىستى جۇيەلى نەگىزدە جۇرگىزۋدى تاپسىردى. ول قۇقىقتىق اعارتۋعا، تاربيەلىك جۇمىستارعا جانە بوس ۋاقىتتى ءتيىمدى ۇيىمداستىرۋعا ەرەكشە نازار اۋدارۋ قاجەت ەكەنىن اتاپ ءوتتى. سونىمەن قاتار، مەكتەپتەردەگى اتا-انالاردى پەداگوگيكالىق قولداۋ ورتالىقتارىنىڭ جانە ايماقتىق پسيحولوگيالىق قىزمەتتەردىڭ جۇمىسىن جانداندىرۋعا باسىمدىق بەرىلدى.