سۋدىڭ دۇرىس ءارى ءتيىمدى ءبولىنۋىنىڭ ارقاسىندا تالاس وزەنىندەگى «ويىق» گيدروتورابى ارقىلى جۇرگىزىلگەن ەكولوگيالىق ماقساتتا سۋ جىبەرۋ ناتيجەسىندە جامبىل وبلىسىنداعى «قازسۋشار» فيليالى قاراكول كولىنە سۋ تولتىرىپ، سۇلۋكول كولىنە دە سۋ جەتكىزە الدى.
سونىمەن قاتار سارىسۋ جانە تالاس اۋداندارىنداعى تابيعي جايىلىمدارعا دا سۋ باردى، دەپ حابارلايدى aqshamnews.kz سالا مينيسترلىگىنە سىلتەمە جاساپ.
جەرگىلىكتى ەكوجۇيەنى ساقتاۋ جۇمىستارى سۋارۋ ماۋسىمى باستالماي تۇرىپ جۇرگىزىلدى. باستاپقىدا وسى ماقساتقا «ويىق» گيدروتورابى ارقىلى 120 ملن تەكشە مەتر سۋ جىبەرۋ جوسپارلانعان ەدى. الايدا ءساۋىر ايىنىڭ ورتاسىنا قاراي ەكولوگيالىق ماقساتتا سۋ جىبەرۋدىڭ جالپى كولەمى 315 ملن تەكشە مەترگە جەتتى.
30 مامىر كۇنى سۋ رەسۋرستارى جانە يرريگاسيا ءمينيسترى نۇرجان نۇرجىگىتوۆتىڭ تاپسىرماسى بويىنشا جامبىل وبلىسىنداعى «قازسۋشار» فيليالىنىڭ ماماندارى ارنايى تەكسەرىس جۇرگىزىپ، تالاس وزەنى ارقىلى جىبەرىلگەن سۋدىڭ سارىسۋ جانە تالاس اۋداندارىنا جەتكەنىنە كوز جەتكىزدى.
ءوز كەزەگىندە جەرگىلىكتى تۇرعىندار اتقارىلعان جۇمىس ءۇشىن سۋ رەسۋرستارى جانە يرريگاسيا مينيسترلىگىنە العىس ءبىلدىرىپ جاتىر.
«بيىل الدىڭعى جىلدارعا قاراعاندا سۋ قارقىندى كەلدى. سۋ نەگىزگى ارنامەن ءوتىپ، جايىلىمدى جەرلەرگە جايىلدى. «قازسۋشارعا» ريزامىز، سونىڭ جۇمىسىنىڭ ناتيجەسىندە سۋ جاقسى كەلدى. وسىنداي كولەمدە سۋ جىل سايىن كەلىپ تۇرادى دەپ ۇمىتتەنەمىز»، – دەيدى شاعالالى ەلدى مەكەنىنىڭ تۇرعىنى ءوڭلىاشىم دۇيسەنبەكوۆ.
«سۋ بيىل ەرتە كەلدى. ناۋرىزدىڭ باسىندا باستالىپ، مامىردىڭ سوڭىنا دەيىن جەتتى. «قازسۋشارعا» العىس ايتامىز. ەگىستىكتە ءشوپ جاقسى ءوسىپ جاتىر، سۋ مول. ءقازىر مال جايىپ، جۇمىس ىستەپ جاتىرمىز»، – دەيدى يگىلىك اۋىلىنىڭ تۇرعىنى ارالباي جانبەكوۆ.