الماتى وبلىسىندا قۇسبەگىلىكتەن ءداستۇرلى «سونار» رەسپۋبليكالىق ءتۋرنيرى ءوتتى.
جارىس مەملەكەت جانە قوعام قايراتكەرى دىنمۇحامەد قونايەۆتىڭ 110 جىلدىعىنا وراي ۇيىمداستىرىلدى. ءىس-شاراعا تۇركيا، جۇڭگو، موڭعوليا مەملەكەتتەرىنەن جانە ەلىمىزدىڭ ءار ايماعىنان 15 كوماندا قاتىستى، دەپ حابارلايدى Almaty-akshamy.kz 24.kz-كە سىلتەمە جاساپ.
«سونار» قۇسبەگىلەر باسەكەسى العاش رەت الماتى وبلىسىندا وسىدان 24 جىل بۇرىن باستالدى. كەيىن اۋقىمى كەڭەيىپ، ەلىمىزدىڭ باسقا وبلىستارىندا وتەتىن بولدى. كونەدەن كەلە جاتقان كوشپەندى حالىقتىڭ ساياتشىلىق ونەرىنە جاستاردىڭ قىزىعۋشىلىعى ارتا تۇسكەن. قۇسبەگىلىك ۇرپاقتان-ۇرپاققا جالعاسىپ كەلە جاتقان اۋلەتتىڭ كەنجەسى - ايداردىڭ جاسى جەتىدە. بۇل جارىستا ايداردىڭ قارشىعاسى جۇلدەلى ءۇشىنشى ورىننان تابىلدى.
ءار قىراننىڭ سامعاۋىن، قانات قاعۋىن، اڭعا ءتۇسۋىن تورەشىلەر قاداعالاپ وتىردى. ساياتشىلىق ءداستۇردى جالعاۋشى قاريالار سىن-ەسكەرتپەلەرىن ايتىپ، اقىل-كەڭەستەرىن بەرەدى. ال ەلىمىزدە ساياتشىلىقتىڭ جاڭعىرۋىنا ەلەۋلى ۇلەس قوسىپ كەلە جاتقان باعدات مۇپتەكە قىزى جاس قۇسبەگىلەردىڭ ءوسىپ كەلە جاتقانىن ايتادى. سونىڭ ىشىندە قىزداردىڭ دا بولعانىنا قۋانىشتى.
«ءبىراز قىزدار بوي تۇزەدى. موڭعوليادان كەلگەن الەم تانىعان ايشولپان نۇرعايىپ قىزى. ودان كەيىن ەكىنشى - شىعىس قازاقستان وبلىسىندا ايزەرە دەگەن قىزىمىز سەگىز جاستا. بۇگىن ەندى وسى قۇسبەگىلىككە كەلەشەكتە قولىنا قىران قۇس قوندىرماعان كۇنىڭ وزىندە، ۇيىمداستىرۋ جاعىنا قاراسىن دەگەن تالابى وتە جوعارى. بۇل بالا قارشىعا، يتەلگىگە جۇگىرمەيدى. ول بۇركىتپەن باستاعان قىز. سوعان قاراعاندا كەلەشەكتە ۇلكەن ناتيجە كورسەتەدى عوي دەپ ويلايمىن»، - دەيدى «قىران» فەدەراسياسى قوعامدىق قورىنىڭ اتقارۋشى ديرەكتورى باعدات مۇپتەكە قىزى.
ءۇش كۇن بويى وتكەن جارىسقا 70 قىران قاتىسىپ، جەتەۋى فينالعا شىقتى. تۇلكى مەن قارساققا تازى مەن بۇركىتتىڭ قاتار تۇسكەن ءساتى دە بولدى. جەتى بۇركىت اراسىنداعى سىن ەكى ساعاتقا سوزىلدى. بارلىعى قاشقان اڭدى الىسقا ۇزاتپاي، تەگەۋرىندە مىقتاپ شەگەندەدى. ال باس جۇلدەنى استانادان كەلگەن قۇسبەگى كۇنتۋعان سەرىكبەكتىڭ بۇركىتى جەڭىپ الدى. بۇدان بولەك «سونار» تۋرنيرىندە قارشىعالار مەن يتەلگىلەردىڭ سىنى مەن قۇماي تازىلار جارىسى ءوتتى. ق ر قۇسبەگىلىك فەدەراسياسىنىڭ مالىمەتىنشە، 2024 جىلعى بۇكىلالەمدىك «كوشپەندىلەر» ويىنىن الماتى وبلىسىندا وتكىزۋ جوسپارلانىپ وتىر.
ساياتشىلىق ونەردى تاماشالاۋعا كەلگەن كورەرمەندەرگە ۇلتتىق ويىندار كورسەتىلدى. جامبى اتۋدا قىزدار دا مەرگەندىك تانىتتى. اتقا شەبەر مىنەتىن جىگىتتەر تەڭگە ءىلىپ، اۋدارىسپاققا قاتىستى. تەاترلاندىرىلعان قويىلىمدا باتىرلاردىڭ شايقاسى ساحنالاندى. باس جۇلدەگە 1 ملن تەڭگە بەرىلدى. جالپى، جارىسقا قاتىسقان قۇسبەگىنىڭ ەشقايسىسى سىيلىقسىز قايتپادى. ارنايى سىيلىقتار مەن العىس حاتتار تابىستالدى.