حالىقتىڭ ۇدايى كوشۋى ۇلتتىق قاۋىپسىزدىككە قاتەر توندىرەدى.
بۇل تۋرالى سەناتتىڭ ەكونوميكالىق ساياسات، يننوۆاسيالىق دامۋ جانە كاسىپكەرلىك كوميتەتىنىڭ حاتشىسى سەرىك شايداروۆ مالىمدەدى، دەپ حابارلايدى Almaty-akshamy.kz.
«2010-2020 جىلدار ارالىعىندا ىشكى كوشى-قون اعىنى ەسەبىنەن حالىقتىڭ ءوسۋى اقتوبە وبلىسىندا، استانا، الماتى جانە شىمكەنت قالالارىندا بايقالدى. اتالعان وڭىرلەردە ەل حالقىنىڭ 36%-ى تۇرادى. سونىمەن قاتار، قاراعاندى، قوستاناي، پاۆلودار، سولتۇستىك قازاقستان جانە شىعىس قازاقستان وبلىستارىنان حالىق جۇيەلى تۇردە كوشىپ جاتىر. مۇنىڭ ءبارى، سايىپ كەلگەندە، وڭىرلەر اراسىنداعى ەلەۋلى الەۋمەتتىك جانە ەكونوميكالىق تەڭگەرىمسىزدىكتەرگە عانا ەمەس، سونداي-اق ەلدى مەكەندەردىڭ، اسىرەسە شەكارا ماڭى وبلىستارىنىڭ ءالسىز قونىستانۋىنا بايلانىستى ۇلتتىق قاۋىپسىزدىككە تونەتىن قاتەرلەردىڭ تۋىنداۋىنا الىپ كەلەدى»، - دەدى سەناتور.
سەناتوردىڭ سوزىنشە، وڭىرلەردە جۇمىس ورىندارىن اشۋ جانە ينجەنەرلىك ينفراقۇرىلىمدى دامىتۋ جاقىن ارادا ورتالىق جانە جەرگىلىكتى بيلىك ءۇشىن باسىم مىندەت بولۋعا ءتيىس.
«بۇل جۇمىس، ەڭ الدىمەن وڭىرلىك ستاندارتتار جۇيەسىنە بايلانىستىرىلىپ، قالا مەن اۋىل تۇرعىندارى ءۇشىن الەۋمەتتىك جانە ينجەنەرلىك-تەحنيكالىق ينفراقۇرىلىمنىڭ قولجەتىمدىلىگى تومەن ستاندارتى بوينىشا جۇرگىزىلۋگە ءتيىس. 2019 جىلدان باستاپ قولدانىلىپ كەلە جاتقان وڭىرلىك ستاندارتتار جۇيەسى قايتا قاراۋدى تالاپ ەتەدى دەپ ەسەپتەيمىز. ويتكەنى، اۋىلدىق ەلدى مەكەندەر ءۇشىن بەكىتىلگەن وبەكتىلەر مەن قىزمەتتەر تىزبەسى ۆەتەريناريالىق پۋنكت، مال قورىمدارى، قاتتى تۇرمىستىق قالدىقتار پوليگوندارى سياقتى ماڭىزدى ورىنداردى كوزدەمەيدى»، - دەدى سەرىك شايداروۆ.
ايتا كەتەيىك، بىلتىر كوشىپ كەلۋشىلەر سانى جونىنە ەل وڭىرلەرى اراسىندا الماتى قايتادان كوش باستادى. شاھارعا وزگە ايماقتاردان 35،3 مىڭ ادام قونىس اۋدارعان.