ق ر ۇكىمەتىنىڭ قاۋلىسىمەن 2 اقپان كۇنى ۇلتتىق ۇلان اسكەري ينستيتۋتى اكادەميا بولىپ قايتا قۇرىلعان بولاتىن.
پەتروپاۆلداعى اكادەميانىڭ سالتاناتتى اشىلۋ راسىمىنە ق ر ۇلتتىق ۇلان باس قولباسشىسىنىڭ تاربيە جانە الەۋمەتتىك-قۇقىقتىق جۇمىستار جونىندەگى ورىنباسارى، گەنەرال-مايور الىبەك سەرالييەۆ، اسكەري وقۋ ورنىنىڭ ءبىرىنشى باسشىسى بولعان، وتستاۆكاداعى گەنەرال-مايور امانگەلدى دۇكەنيەۆ، وتستاۆكاداعى پولكوۆنيك ءسابيت احمەتوۆ، اتالمىش وقۋ ورنىن ۇزدىكسىز 11 جىل بويى باسقارعان، تۇڭعىش پرەزيدەنت - ەلباسى نۇرسۇلتان نازاربايەۆ اتىنداعى ۇلتتىق قورعانىس ۋنيۆەرسيتەتى ۇلتتىق ۇلان فاكۋلتەتىنىڭ باسشىسى، گەنەرال-مايور جۇمابەك احمەتوۆ، وقۋ ورداسىنىڭ وفيسەرلەرى مەن پروفەسسورلىق-وقىتۋشى قۇرامى، ارداگەرلەر قاتىستى، دەپ حابارلايدى Almaty-akshamy.kz
سالتاناتتى ءراسىم الاڭعا اسكەري ينستيتۋتتىڭ جاۋىنگەرلىك تۋىن اكەلۋمەن باستالدى. وسى كۇننەن باستاپ اسكەري وقۋ ورنىنىڭ اكادەميا اتانۋىنا جانە جاڭا فورماسياداعى وفيسەرلەردى دايىنداۋىنا رەسمي تۇردە جولداما بەرىلدى.
جەكە قۇرامنىڭ الدىندا العاش ءسوز العان گەنەرال-مايور الىبەك سەرالييەۆ وسىدان شيرەك عاسىر بۇرىن مەملەكەت باسشىسىنىڭ جارلىعىمەن ىشكى اسكەرلەر، بۇگىنگى ۇلتتىق ۇلان ءۇشىن وفيسەر كادرىن دايىندايتىن اسكەري وقۋ ورنىنىڭ قۇرىلعانىن اتاپ ءوتتى.
كەيىننەن گەنەرال-مايور جۇمابەك احمەتوۆ، ينستيتۋت ارداگەرلەرى وتستاۆكاداعى گەنەرال-مايور امانگەلدى دۇكەنيەۆ پەن وستاۆكاداعى پولكوۆنيك ءسابيت احمەتوۆ ىزگى تىلەكتەرىن ءبىلدىردى.
سالتاناتى شارا كەزىندە قىزمەتتە قول جەتكىزگەن تابىستارى، اسكەري وقۋ ورنىنىڭ قالىپتاسۋى مەن دامۋىنا ولشەۋسىز ەڭبەك سىڭىرگەن اسكەري قىزمەتشىلەر مەن ارداگەرلەرگە ق ر ىشكى ىستەر ءمينيسترى، قورعانىس ءمينيسترى، ۇلتتىق ۇلان باس قولباسشىسىنىڭ جانە سولتۇستىك قازاقستان وبلىسى اكىمىنىڭ اتىنان مەدالدار، گراموتالار مەن العىس حاتتار، سونداي-اق مەرزىمىنەن بۇرىن اسكەري اتاقتار تاپسىرىلدى.